Hallo!

Helaas hebbe we vannach allebei neet geweldig geslaope. Beej mich waas ut zoe erg det ik um kwart euver 5 maar bin opgestaon en naor ut strand bin gelaupe um de zonsopkomst te zeen. Dae waas moei, dus toch ein good begin van de daag. Nao ut ontbijt hebbe we os greij gepak en zien we met ozze tuktuk richting Nilaveli Beach gereeje veur de activiteit van vandaag: snorkele!

Onderwaeg woorte we staonde gehalde door de politie: ozze lampe stonde nog aan. Wat is dan precies ut probleem, zouse dinke? Nou, volges deze politieman waas det bliekbaar erg geveurlijk. Cees had os van te veure verteld det de politie heej nogal corrupt kin zien, en det ze eur baeter gewoen wat geld kins toeschuve as ze euver ein boete beginne. Zoe gezag, zoe gedaon, en ein paar minute later mochte we gelökkig weer doorrieje.

We kwame aan op Nilaveli en woorte metein aangespraoke of we met ein bootje mei woue naor Pigeon Island. We hadde online nogal wisselende verhaole gelaeze euver Pigeon Island, en we vonde ut ouk behuurlijk priezig. Van de eigenaer van ozze accommodatie hadde we ein alternatieve optie aangerooije gekrege: Coral Island. Ouk heej zouse moeie visse en koraal kinne zeen, maar waas de kans op haaie en schildpadde wat kleiner.

Met ein klein bootje vaarde we richting Coral Island, waor ouk al andere bootjes in ut water looge te dobbere. We krege flippers, un duikbril en snorkel en koste ut water in. We hebbe huuuuul vuul visse gezeen, groete en kleine, zwarte en gekleurde, dieke en dunne. Helaas hebbe we dr gen foto’s van kinne make. Ouk waas dr vuul koraal te zeen, waorvan ein groet deil toch wal verbleekt waas. Det is toch vervaelend um te zeen. Op ein gegaeve moment woort de zië wat wilder en zien we truuk gezwomme naor ut bootje. Dae schommelde flink op en neer, en taege de tied det we truuk beej de kust ware, ware we allebei misselijk. Det waas minder, maar ach, ut snorkele waas ut zeker waerd!

Truuk beej de accommodatie weer ef lekker gezwomme, waor we inens ein kleine kameleon zooge zitte. We hebbe de daag weer aafgeslaote beej Fernando’s, zonder voetbal deze kier.

Geschreven door Mayke.geniet