Hallo!

Vanmorge op tied opgestaon, want um 6 aor woorte we opgehaold veur ein safari in Hurulu Eco Park. In de buurt van Sigiriya zien 3 national parken waor se olifante kins spotte. Degene waor we de safari boekte raadde Hurulu aan, en dan veural in de morge. Dan wuurd ut park nog neet euverspoeld met andere jeeps met toeriste. Veur os gen probleem!

Met de jeep reeje we in un dieke 20 minute naor de ingang van ut park. Det waas eigelik al bes ein leuk ritje. Beej de ingang waort ut daak van de jeep gehaold en mochte we gaon staon. Lekker hobbele, dus good vas halde. Binne ein mum van tied reep de guide al: elephants! En jao huur, aan de rechterkant ein groepje olifanten. De begroeiing is behuurlijk hoeg, dus we koste ze nog neet super good zeen. De olifante lepe op ein gegaeve moment weg, en toen koste we ze vanoet ein ander punt baeter zeen. Ut waas ein groep vrouwtjes met ouk ein paar kleintjes dr beej. Kei schattig!

In totaal hebbe we ein safari gehad van ongevier 3 aor, waorbeej we verschillende groepe olifante hebbe gezeen, en ein paar losse mannetjes. De guide vertelde os det de mannetjes meistal allein laeve, en allein tijdens ut paarseizoen de groepe met vrouwtjes opzeuke. Baby olifante blieve ongevier 12 jaor beej de mooder, as ut vrouwtjes zien blieve ze meistal beej de groep, en mannetjes zondere zich dan aaf.

Op ein gegaeve moment stond dr ein groep vlak beej de waeg, toen koste we ze pas ech good zeen! We stonde daor met ein stök of 5 jeeps (mier hebbe we dr dink ik ouk neet gezeen), en de groep wou de waeg euverstaeke. Ze hadde ein baby beej zich, en woorte toen huul beschermend. Biezonder um te zien wie ze zich dan um de baby heer positionere en wappere met de oere (jao mam, deze kier wal!).
De jeeps ginge ein bietje op zie zoedet de groep dr door kos.

Op ut ind zien we nog naor ein oetkiekpunt gegaon waorse moei oetzich hads euver ut park. En vanoet daor zooge we ouk in de verte weer ein paar olifante. Ein gave tour!

Beej truukkomst krege we ein heerlik ontbijtje beej de accommodatie. We hebbe lekker ef gerelaxed, en zien smiddaags nog ef ut stadje gaon verkinne. Ut stadje zelf stelt neet vuul veur, maar de hes heej wal ein prachtig oetzich euver Lion Rock. Op ein blog had ik de tip gelaeze um beej Kumara te gaon kieke. Ein mannetje dae met brons allerlei dinger mak. Jeroen haet heej ein boekenleggertje gekoch waor zien naam in gegraveerd woart.
We zooge op Google Maps nog ein paar viewpoints, maar de waeg daor heer waas slech, of ut viewpoint waas neet te vinde. Helaas. We zien rond zonsondergang beej Soul Food gaon aete waorse un prachtig oetzich hads op Lion Rock. Eine moeie aafsloeting van deze biezondere daag!

Geschreven door Mayke.geniet