Hallo!

Vanmorge krege we beej de accommodatie ein simpel maar prima ontbijt. Vervolges woorte we um 8 aor opgehaold door ein lokale gids: op verkenning in Anuradhapura.

Anuradhapura waas de ierste religieuze hoofdstad van Sri Lanka. Door de rieke historie zien dr ontzettend vuul tempels en bezienswaardigheden. Dit leet allemaol verspreid euver ein vreej groet gebied, dus we ginge met ozze tuktuk op paad. De gids reej, en weej mochte gezellig same achterin.

We begoste de tour beej Isurumuniya Rajamaha Viharaya, ein in ein rots gebouwde tempel. De gids vertelde vanalles euver de geschiedenis van Anuradhapura en ut Boeddisme, hae wis dr ech super vuul vanaaf, erg interessant! Zoe vertelde hae det de meiste tempelcomplexe bestaon oet verschillende onderdeile: ein stoepa, ein boeddhabeeld en ein vijgenboom. Beej deze tempel waas dr ouk ein kleine grot waor minse muntjes in probeerde te goeie. Det hebbe weej natuurlijk ouk ef geprobeerd, en ut is os allebei gelök! Det ging uiteraard gepaard met goedkeurende knikjes en glimlachjes van de minse um os heer.
Um os heer zooge we allemaol locals, allemaol in ut wit gekleid, en met offers beej zich: bloome, wierook, drankjes, maar ouk ganse pakkette. Super moei um te zeen wie u geluif heej zo’n groete rol speult.

Vervolges ginge we naor Sri Maha Bodhi. Dit is ein vruuge stek van de heilige vijgenboom waoronder Boeddha verlichting zou hebbe bereikt, en ein van de aldste heilge bomen ter wereld. Dit complex is altied verzorg gebleve door ein speciale groep minse, waordoor ut taege de natuur beschermd is gebleve. Ut waas heej erg drök met ouk weer allein maar locals, biddend en met offers. We hebbe heej ouk zelf ein soort kaarsje aan meuge staeke. Ut is moeilijk um dit in ein blog good te vertelle, maar ut waas ech ein super biezondere plek vonde weej!

Daornao ginge we naor de alde stad, dae dateert oet de derde ieuw veur Christus, maar is verlaote rond 995, waordoor de natuur/jungle ut terrein haet euverwoekerd. Tiedes de ingelse tied eind negentiende ieuw zien ze deile heej van weer gaon opgrave.
We hebbe verschillende onderdeile bezoch: stoepa’s, groete waterbassins en ruines van tempels. Vruger ware de stoepa’s wit, maar umdet ze noow op de Unesco erfgoedlies staon, meuge dr gen veranderinge mier weere aangebrach, dus meuge ze neet geschilderd were en zien ze noow broen.
Gedurende de daag woort ut steeds klammer en wermer, flink zweite dus! En de kos ut ouk steeds mier merke aan de vloer. In de tempels meugse namelijk gen schoon aan, dus lupse op bloete veut. Gelökkig hadde we sokke beej os die wal aan mochte taege de hitte van de grond! Bloete kneen en schouwers meug trouwes ouk neet in de tempels. Ik had ein lange jurk aan, maar Jeroen meus iddere kier ein sarong aan um zien bein te bedekke.

Oetintelijk ware we nao 2 aor pas weer truuk beej de accommodatie. Ut is trouwes liegseizoen in Sri Lanka, en det kinne we ech good merke. Tiedes de ganse toer vandaag hebbe we misschien 3 andere toeristen-stellen gezeen. Vaerder allein maar Sri Lankanen, die dr ech kwame um te bidde, ech super biezonder um te zeen!

We hadde ind van de daag eigelijk nog naor Mihintale wille gaon. Ouk weer ein belangrijke plek veur ut Boeddhisme, waor se ouk ein moeie zonsondergang kins zeen. Helaas raegende ut, dus hebbe we dit euvergeslage.
Wal zien we nog gaon aete beej Golden Mango, ein Indiaas restaurant. Neet de gezelligste toko, maar we hebbe heej ech heeeeerlijk gegaete!

Al met al ein super biezondere daag!

Geschreven door Mayke.geniet