Gooijendaag!

Vanmorge woorte we pas laat opgehaold door ozze chauffeur, dus hadde we nog efkes tied um naor de mert in Ubud te goan. Smorges van 6-9 is dit ein traditionele mert, en daornao wuurd hae umgebouwd tot ein toeristische mert met allemaol souvenirs.
Nao ozze souvenirs gekoch te hebbe zien we truuk gelaupe naor ut hotel, waor de chauffeur os al stond op te wachte.

We zien iers naor de Tanah Lot gereeje, ein bekinde tempel aan ut water. Door de Hindoeïstische feestdaag en de daorbeej hurende ceremonies waas ut vandaag ontzettend drök op de waeg. De rit deurde daordoor wat langer as gepland. De chauffeur vertelde os det hae ut nog noeit zoe drök had gezeen.
We kwame aan beej de Tanah Lot, en hebbe heej efkes rondgelaupe.

Daornao weer truuk de auto in. De chauffeur wis wal ein restaurantje waor we koste lunche, en naor zien zegge waas det hielemaol neet deur. Aangekomme beej ut restaurant bleek det ze de helf van de gerechte op de kaart vandaag helaas neet hadde. En waat de chauffeur had verteld klopte hielemaol neet: dit waas veroet ut deurste restaurant waor we gewaes zien!
Umdet dr niks op de kaart stond waor weej zin in hadde, hebbe we os laote aafzette beej os hotel in Sanur.
Wauw waat ein hotel zeg! Resort mot ik eigelijk zegge. Ut is prachtig aangelag, aan ut strand en met prachtige zwumbade. We krege ein gratis update van de kamers: mazzel! Ouk de kamers ware hielemaol top. Lekker ruum, schoen en ein fijne badkamer. Heerlijk um heej ozze letste dage door te bringe!

We hebbe lekker aan ut strand geluncht, en hebbe daornao heerlijk gerelaxed aan ut zwumbad.
Umdet we laat hadde gelunch, hadde we saoves neet ech honger. We hebbe lekker urges waat gedronke, en zien daornao naor ein sportcafé gegaon, um naor de race van Max te kieke.
Super gezellig! De tent zoot vol met Nederlanders en Australiërs. Taegeneuver os zoot ein Australisch stel van rond de 50 waor we gezellig mei hebbe geklets.
Zoe laat as vanaovend hebbe we ut nog neet ierder gemak!

Haije en tot morge!

Geschreven door Mayke.geniet