Hola!

Vanmorge zien we vanoet Getsemani naor ut alde centrum gelaupe, waor we ein Free Walking Tour gaon doon. Onderwaeg kwame we door ein park, waor Jeroen zich inens kapot schrok. Dr zoot ein groëte leguaan vlak naeve um! Vaerderop waorte we aangespraoke door ein man dae maar bleef zegge: "There is a slow", al wiezend naor de buim. Weej hadde gen idee wat hae precies bedoelde, maar inens zooge we ut: ein luiaard (sloth)! We hadde op det moment neet vuul tied , want we meuste os melde veur de tour, dus weinig tied um oetgebreid foto's te make op det moment.

De tour waas erg leuk en interessant. We hadde ein super enthousiaste gids, en ze had eur tiener-dochter ouk meigenaome. Ze haet vuul verteld euver de geschiedenis van de stad. Zoeas de bezetting door de Spanjaarde, Franse en Ingelse, de slavernij en de onaafhankelijkheid. De tour begos in ut alde centrum, en we kwame daor allemaol leuke straote en op leuke pleine, kreege onderwaeg ein pilsje gemak op basis van cassave, en krege tips veur leuke restaurants. Ut twieëde deil van de tour waas in Getsemani, de wiek waor ouk ozze accommodatie leet. Op waeg daorheer kwame we weer door ut park met de luiaarden en leguanen. En dr zitte ouk aapjes! De gids vertelde det dit diere zien die oeit zien gered, en de stad ze in ut park ein nieje laefplek haet gegaeve. Dr is speciaal personeel wat veur de diere zurg, en de ganse daag rondlup um ein oogje in ut zeil te halde. Vruuger zoote dr bliekbaar ouk eekhoorns, maar die krege ruzie met de aapjes en det is neet zoe moei geëindig. Dr zien in idder geval gen eekhoorns mier...

In Getsemani krege we oetleg euver de wiek. Dit is nog ech ein wiek waor vuul locals woene, en dr is de aafgelaupe jaore ouk vuul geïnvesteerd um dr ein prettige buurt van te make. Ut is huul toeristisch, maar ut is wal ouk nog ech gerich op de minse die dr woene. Ouk is heej vuul street art te vinde, en ouk heej weer allemaol met ein gedachte dr achter. Al met al ein erg leuke tour!

Nao de tour zien we truuk gelaupe naor ut alde centrum. Umdet ut heej taege de middaag blood heit wuurd, waas ut ein stök röstiger as vanmorge. We hebbe foto's gemak van vrouwe in klederdracht. We hadde ze al vuul zeen rondlaupe. Veur ein klein bedraag meugse eur op de foto zette, daormei kinne zeej eur familie onderhalde. Vervolges zien we, op aanraoje van de gids, gaon lunche beej Crepes & Waffles. Dr werke heej allemaol alleinstaonde vrouwe. De kaart waas super oetgebreid, met uiteraard allemaol verschillende soorte crepes en waofels. We hebbe allebei iers ein hartige crepe genaome, en daornao as toetje nog luxe waofels gedeild. We hebbe lang op os aete motte wachte, want jeetje wat ging heej alles langzaam. En det met zoevuul personeel! Maar, de crepes en waofels ware heerlijk!

Aan ut ind van de daag zien we naor de stadsmaore gelaupe. We hadde online gelaeze det heej beej ein café de zonsondergang good te bekieke waas. We zien neet beej ut café gaon zitte, maar ein klein stökske vaerderop gewoen op de stadsmaor. Dr leepe allemaol minse met koelboxe die kald beer verkochte. Met ein pilske in de hand hebbe we zoe lekker de zonsondergang gezeen!

Doordet we oetintelijk laat gelunch hadde, hadde we neet enorm vuul honger. We beslote daorum um op ut pleintje in Getsemani beej ein van de streetfood tentjes wat te aete. We hadde gister gezeen det beej ein van de kraompkes ein lange rie stond, en ouk noow waas ut daor weer ontzettend drök. Dan mot ut aete daor ouk good zien, dachte we. En hoe! We krege ein volgelade hamburger, bijna neet te aete zonder bord en bestek, maar LEKKER! Op ut pleintje komme 's aoves allerlei groepjes straotartieste optrede. En ouk heej laupe 's aoves allemaol minse rond met koelboxe die kald beer verkaupe. Met ein paar pilskes, gooije hamburger en entertainment hebbe weej os vanaovend good kinne vermake!

Geschreven door Mayke.geniet