Hallo!

Vanmorge hebbe we Ella op tied verlaote en zien we naor Arugam Bay gereeje. Ut letste deil van de route ging door ein National Park, maar helaas hebbe we gen olifante gezeen.

Begin van de middaag kwame we aan in ut hostel. Ein leuke en hippe accommodatie waor we ein groete privekamer hebbe. Arugam Bay leet aan de oostkust van Sri Lanka, en alles heej steit in ut teike van surfen. Ut stadje zit vol met surfschoele en tentjes waorse surfboards kins hure. En dr rieje heej allemaol tuktuks met surfboards op ut daak gebonde. We hebbe dan ouk beej ut hostel metein ein surfles geboek veur ut ind van de middaag.

Nao lekker te hebbe gelunch zien we nog ef euver ut strand gelaupe. De zon steit heej flink aan, en ut is ein stök wermer as de plaatse waor we de aafgelaupe daag zien gewaes. Ut is wal iets minder vochtige wermte heej, det is dan wal weer lekker.
Um 4 aor stond dr ein tuktuk klaor um os mei te neme naor Peanut Farm, ein van de surfplekjes waor veural lesse veur beginners gegaeve were.

Same met ein Frans maedje ging de les van start. We begoste op ut druge, waor de instructeur os oetloog wie we ut water in motte gaon, wie we ut board vas motte halde en wat we motte doon as dr emes op dich aaf surft. Daornao ginge we de pop-up oefene, oftewel: hoe se van boeklig op dien surfboard mos gaon staon.
Al snel ginge we ut water in. Ein veur ein meuste we beej de instructeur komme, dae dich good positioneert en ein flinke duw mei guf. En dan is ut probere op te staon!
Nao ein flink aantal kier flink valle, is ut os wal allebei gelök um ein paar kier te blieve staon!

Saoves hebbe we in ut stedje lekker gegaete, en daornao op tied naor bed gegaon. We zien kapot van ein super leuke daag!

Geschreven door Mayke.geniet