Hallo!

Vanmorge hebbe we ein fietstour door Sevilla gehad met ein Nederlandse gids. Lekker um zoe de stad te verkinne en de hoegtepunte te zeen. We ware gelökkig maar met ein klein groepje, want boete os twieë waas dr nog ein groepje van 4 man beej. De fietstoch startte in Triana, de wiek waor os appartement leet, en kwaam daornao oet in ut centrum van de stad. We kwame langs ut alfonso XIII hotel, ut bekindste hotel van de stad. De gids had os net verteld det heej geregeld bekinde minse euvernachte die Sevilla bezeuke (bijv. Willem Alexander en Maxima), toen we inens allemaol gegil haorte en minse zooge renne. Bliekbaar kwaam dr net ein beroemdheid aan. We hebbe ze neet kinne zeen, maar ut ware waarschienlijk de Red Hot Chili Peppers die vanaovend in Sevilla optreeje.

Op ein gegaeve moment kwame we beej ut groete park van Sevilla. Ouk heej dus weer vuul greun, en alles prachtig aangelag. Dit terrein is gebroek veur de Expo van 1929, en ze hebbe geprobeerd zoevuul meugelijk van de toen gebouwde gebouwe ein nieje bestumming te gaeve. We kwame oet beej Plaza España ein prachtig plein met ein nog prachtiger gebouw. We hebbe de fietse aan de kant gezatte zoedet we ef de tied hadde um ut te bezichtige. Euveral is gebroek gemak van mozaïeken, super moei! Beej de hoofdingang woort ouk weer de flamenco gedans, ut blief toch biezonder um det te zeen!

We fietste weer truuk ut centrum in, waor we ef stopte beej ut stadhoes. Ouk weer ein gebouw met ein verhaol, want nog veurdet ut hielemaol klaor waas euverleed de beeldhouwer, en hebbe ze beslaote det nemes anders ut moch aaf make, umdet hae bliekbaar zoe good en gespecialiseerd waas in waat hae deej. Resultaat: ein gebouw waat aan de linkerkant moei is versierd en aafgewerk, en aan de rechterkant nog kaal en grof.

Nao de fietstour hebbe we ef oetgerös in ut appartement, en daornao zien we super lekkere tapas gaon aete in de stad. Nao waat rondgelaupe te hebbe woue we nog ef urges op ein terrasje waat gaon drinke, toen de ober os vertelde det ze ouk ein daakterras hadde. We zien dus metein naor baove gelaupe, en kwame oet beej ein moei daakterras met zitjes en ein zwumbad (van ut hotel in ut gebouw). We hebbe heej heerlijk ef gerelaxed :).

Saoves hebbe we op aanrooije van de fietstour-gids gegaete in ein restaurantje in Triana. Weer eine waor we zelf noeit beej oet ware gekomme, maar we hebbe heeeerlijk gegaete!!!

Geschreven door Mayke.geniet