Vanmorge hebbe pap, mam en ik de Tafelberg gehike via de route Platteklip. Dit schient de ‘mekkelijkste’ route te zien. Moeilijk is de route ouk neet, maar wal ontzettend zwaor! In de volle zon, en allein maar trappe. We hebbe ut gehaold! Zelfs mam met eur hoegtevrees! Iets um trots op te zien. Boave aangekomme hebbe we waat gedronke in ut café, um vervolges met de kabelbaan umlieg te gaon.

In de middaag zien we naor de wienboerderie van de vader van ein patiënt van mich gegaon. Liko en ik zien daor rond Kerst al ens gewaes, en det waas ontzettend leuk. Ouk vandaag krege we weer ein oetgebreide wienpreuverie, waorbeej Dirkie vanalles vertelde euver de wien, de boerderie, etc.
Vervolges hebbe we nog ein rondleiding euver zien terrein gekrege, en mochte we zelfs nog in de ‘cellar’ kieke, waor de wiene were gemak. Erg leuk allemaol.

Helaas moch de daag neet zoe leuk eindige. We zien ’s aoves beej mich in de straot in ein restaurantje gaon oetaete. Op ein gegaeve moment kwame dr 3 gewapende manne binne die ein euverval hebbe gepleeg in ut restaurant. Erg heftig allemaol, maar ut belangriekste is det idderein oke en veilig is.
Gen leuke manier um zo’n leuke daag aaf te motte sloete…

Geschreven door Mayke.geniet