Hallo!

Vanmorge krege we ein heerlijk ontbijtje: un soort pannekoekjes met spicy ei dr tösse. Wat os tot noow toe in Sri Lanka al is opgevalle: as ze zegge det iets neet spicy is, is ut veur Nederlandse begrippe al aan de pittige kant! Gelökkig kinne weej ut hebbe, en de pittigheid heej voeg wal ech iets toe ouk qua smaak.

Vervolges ginge we weer met de tuktuk op waeg, richting Nuwara Eliya. We hebbe ein prachtige route gereeje door de berg en theeplantages. Beej ein moei oetzichspunt zien we gestop en hebbe we lekker gelunch.

De volgende stop waas ein waterval. De route heej naortoe ging dwars door theeplantages, super moei. Op ein gegaeve moment woorte we staonde gehalde daor ein man. Hae waas ein gids en kos os wal naor de waterval bringe, en hae had ut euver iets met “broken”. We begrepe dr neet vuul van, dus beslote gewoen zelf door te rieje. 50 maeter later snapte we wat hae had probere te zegge: de waeg naor de waterval is kapot. Toch maar op zien aanbod ingegaon, en hae brach os via ein verschikkelijke waeg naor de waterval. Ut waas kei moei, maar toen meuste we de hobbelwaeg ouk weer gans truuk... met geknepe billetjes zoote we te haope det ozze tuktuk ut zou euverlaeve. Gelökkig haet hae ut gered :).

Daornao zien we gestop beej de theefabriek Damro Labookellie. Heej krege we ein rondleiding waorin we oetleg krege euver ut proces hoe thee wuurd gemak. Zwarte, greune en witte thee komme in principe allemaol van dezelfde plant, maar door ein andere verwerking kriegse andere smaak. Allein ut stengeltje met de baovestd 2-3 blaedjes wuurd geplök. Baove ut baoveste blaedje zit nog ein soort puntje. Det puntje wuurd in de zon gedruug en is witte thee.

Greune en zwarte thee wuurd nao ut plökke machinaal gedruug en gerold. Vervolges wuurd zwarte thee gesneeje in verschillende groottes, gefermenteerd en gezeefd um de verschillende groottes te splitse.
Ten slotte were greune en zwarte thee nog ein kier gedruug door ut flink te verhitte, maar idder op andere temperatuur en ein andere duur.

Damro verkup 80% van eur thee op de veiling aan thee leveranciers, bijv. Pickwick. Die ut vervolges verwerke tot eur eige product. Per daag werke dr ongevier 700 vrouwe op de plantages, die allemaol rond de 20 kg thee plukke, totaal zo’n 10.000 kg per daag, waorvan nao ut ganse proces ongevier 2500 kg thee van euverblief!

Laat in de middaag kwame we aan in Nuwara Eliya. We hadde al gehuurd det ut dörp zelf neet vuul veurstelt, dus hebbe we beej ein restaurantje vlak beej de accommodatie gegaete.
De accommodatie leet weer baovenop ein berg, dus we kinne ouk heej weer geneete van ein moei oetzich!

Geschreven door Mayke.geniet