Hola!

Vandaag waas ein bietje ein andere daag as gepland. We hadde eigelijk bedach um vandaag ein boettocht met ein Catamaran te gaon make, veur de kust van Cartagena en de Rosario Islands. Maar helaas kwame we dr gister achter det dae tocht vandaag hielemaol neet geit, umdet de boet in onderhald is. Erg jammer. Dr zien nog wal genog andere boettochte die se vanoet heej kins make, maar det zien mier party boat tripjes, neet ech iets veur os...

In plaats van ein boettoch zien we vanmorge weer ef naor ut alde centrum gelaupe um nog wat souvenirs te score. We hadde gister ein leuk beeldje gezeen dae we toch wal geer woue hebbe. De roojs ut natuurlijk al: winkel in, winkel oet, maar ut beeldje waas nerges mier te vinde. Beej éin winkeltje zooge we ze staon, maar neet in de kleur dae weej geer woue. Nao gelunch te hebbe zien we toch nog efkes truuk naor det winkeltje gelaupe, um te vraoge of ze die ech neet ouk in andere kleure hadde. Nae, helaas zei de jong dae os kwaam helpe. Plots kwaam dr van achter in de winkel ein vrouw naor veur gelaupe. Ze vroog wat we precies zochte, pakte eur telefoon en begos te belle. De jong woort de winkel oetgesteurd, en dr waort os verteld det we efkes meuste wachte. Ein paar minute later kwaam de jong truuk met ein groete does met allemaol van die beeldjes in verschillende kleure. En de kleur dae we woue zoot dr tösse!!! Weej natuurlijk hielemaol bliej. Ut woort netjes ingepak, en we koste eindelijk truuk naor os hostel. We zien heej snel in ut zwumbad geplons. Met de hitte van vandaag koste we det wal ef good gebroeke.

Um toch nog un activiteit te hebbe vandaag, hadde we ein kaokworkshop geboek. We ware maar met z'n 2e, maar det waas eigelijk hartstikke leuk. De kok, Omar, sprook neet zoe good Ingels, dus dr waas nog emes beej um te vertalen. We krege allebei ein schort en koksmuts, prachtig... Ut veurgerech waas ein soort bakje van gefrituurde bakbanaan met daorin ein salsa. Veur de hoofdgerechte hadde we van te veure al ein keuze motte make wat we woue make. Jeroen had gekaoze veur garnale in knoflooksaus, en ik veur zeebaars in knoflooksaus. Heej beej krege we ries en patacones. Patacones zien, net as de bakjes van ut veurgerech, dubbel-gefrituurde greune bakbanaan. Ut wuurd heej vuul gegaete as beejgerech of as snack. Zoeas se misschien wal wets lus ik gen banaan, maar dit waas wal erg lekker!
De workshop waas erg leuk, en ut resultaat erg lekker!

Nao de kaokworkshop zien we weer naor ut alde centrum gelaupe. We hadde gister tiedes de tour te hure gekrege det heej ein hotel is met ein moeie rooftopbar, waor se ouk weer moei de zonsondergang kins bekieke. Ein poep-chic hotel bleek toen we dr aankwame! Alles zoog dr super luxe oet, ein prachtig zwumbad op de rooftop, en dus ouk ein bar. We veulde os wal ein bietje underdressed heej! Desondanks hebbe we heej genaote van ein lekkere cocktail met ein moei oetzich euver de stad. Helaas begos ut langzaam maar zeker ein bietje bewolkt te were, dus de zonsondergang zelf waas helaas minder good te zeen. Maar dr vlege heej super vuul vogels euver de stad, dus dr waas genog te kieke!

Truuk in Getsemani zien we dan toch eindelijk in ein van de smalle straotjes mei gaon doon aan happy hour. De kriegs heej dan 2 cocktails veur ongevier 5 euro! Ut waas ein drökte van jewelste, want Colombia meus voetballe. Nao de wedstrijd ging de muziek hard aan. En dan gaon ze los huur, de Colombianen! Ut waas ech ein feestje, ein super gezellige aovend!

Geschreven door Mayke.geniet