Hallo hallo hallo!

Vandaag waas eindelijk de groete daag aangebraoke, waor Liko en ik al ozze ganse reis naor oet hebbe gekeke: vandaag ginge we BUNGEEJUMPEN!

Weej hebbe dr veur gekaoze um ozze bungeejump te doon vanaaf de Bloukrans brug, vlakbeej Stormsriver. Met 216 maeter is dit de hoegste bungee-brug ter wereld, en steit hae op plaats 3 van de hoegste bungeejumpplekken ter wereld! Onderwaeg in de auto daor naortoe waas ik ontzettend zenuwachtig. Ozze sprong zou um 11 aor zien, en we meuste ein aor van te veure aanwezig zien veur de veurbereidingen. Naodet we os hadde aangemeld krege we ein tuigje aan, en toen waas ut wachte geblaoze…

Um de tied te doeie hebbe we iers de brug van ein aafstandje bekeke, en toen zooge we al emes springe. Vanaaf ut moment det ik det zoog, waas ik al ein stuk minder zenuwachtig.
Um kwart veur 11 waas ut tied um met de ganse groep dae um 11 aor zou springe de brug op te gaon. Via ein soort kooi lepe we naor ut midde van de brug toe, toch wal hoëg huur!

De allerierste van ozze groep dae meus springe waas Liko! Hae woort klaorgemak, en de muziek ging aan. De sfeer op de brug waas ontzettend leuk. De medewerkers dansten dr op los, waat dr veur zurgde det idderein zich toch waat mier ontspanne veulde.
Toen waas ut tied veur Liko um te springe. Op ein TV-schermpje koste weej de ganse sprong volge, ontzettend vet en idderein waas aan ut juichen en klappen.
Nao ein tiedje waas ut ouk veur mich tied um mich klaor te laote make. De zenuwe kwame weer wat mier umhoeg. Zeker op ut moment toen ik op ut randje meus gaon staon, gierde de adrenaline door mien lief. De zuus dan inens die 216 maeter umlieg, en besefs detse dan umlieg mos gaon springe.

1, 2, 3, BUNGEE!!
Det geveul asse dan naor onder vels is ech onbeschriefelijk, det mosse zelf hebbe meigemak um te kinne begriepe. Nao ein paar kier op en neer te zien gestuiterd hingse daor, ut oetzich waas ech prachtig! Ik waas wal blie toen dr ein man naor onder kwaam, um mich weer naor baove te takele en rechop te zette.
BUNGEEJUMPE IS ECH UT VETSTE WAT IK OEIT HEB GEDAON!!!

Op mien facebook-pagina gao ik ut filmpje uploaden, veur de minse die ut wille zeen ;).
(Ik heb nog gen idee wannier ut precies online kump, want de WiFi is heej ontzettend langzaam…)

Nao de bungeejump zien we doorgereje naor Knysna, ozze volgende bestumming. We hebbe de res van de daag waat in dit prachtige stedje rondgelaupe en ’s aoves heerlijk gegaete.
Ein gooije aafsloeter van ein fantastische ervaring en ein fantastische daag!

Haije en tot morge!
Kusjes en vuul leefs,
Bungee-Mayke

Geschreven door Mayke.geniet