Hallo!
Ik heb ein ontzettend leuk weekend gehad!

Vriedaag waas de 2e sportdaag op stage. Ut ging dit kier ein stuk baeter, want gelukkig ware dr noow wal andere stafleden um os te ondersteunen. Helaas ware ze in ut begin nogal kinderachtig bezig, en hadde ze ut drukker met elkaar as met os helpe, maar naor ein tiedje ging ut prima. De bewoeners deeje good mei, totdet dr helaas ruzie ontstond en ein aantal bewoeners meuste were weggehaold. Ut waas toen efkes ein moment enorme chaos, maar gelukkig koste we wal gewoen doorgaon en waas ut ein geslaagde ochtend.

Vriedaag waas dr ein festival in Kaapstad waor de meiste hoesgenote naortoe zien gegaon. Liko, ein ander maedje en ik hadde beslaote gen kaarte te kaupe.
Vriedaagaovend zien weej met zn 3e en nog ein andere vriendin naor ein BMX/Mountainbike contest gewaes. Ein vrind van os dae heej woent deej mei en hae vertelde os det dr ouk ein paar wereldtoppers meideeje. Ze meuste ein parcours aaflegge en daorin zoevuul meugelijk trucs laote zeen um punte te score. WAUW wat waas det gaaf zeg! Ut is ech ongeluifelijk wat die jonges allemaol kinne op ein fiets! Ronddreie, backflips, frontflips... Jao ik heb wal waat terme gelierd dae aovend! Hahah

Zaoterdaagmorge bin ik iers weer naor de Old Biscuit Mill gewaes, bijna ein standaard activiteit op zaoterdaag, maar ut is daor ouk altied zoe gezellig!
's Middaags zien we naor Stellenbosch gereje, ein wienstreek vlakbeej Kaapstad um ein 'Wynfees' te bezeuke. De entree waas ongevier 15 euro, en daor kreegse ouk metein ein wienglaas. Op ut terrein stonde euveral tenten waor verschillende wienboerderijen eur stent hadde. Euveral kos se gratis wien preuve! Heerlijk! Ik heb nog noeit zoevuul soorten wien op 1 daag gedronke hahahah.
De sfeer op zo'n evenement heej is ontzettend leuk. De minse zien huul erg vrintelik en legge dich ouk gaer oet euver de wien daese wils preuve.
's Aoves ware we oetgenudig daor ein paar Fransen veur eur houseparty. Die Fransen zien ech knettergek! Op ein gegaeve moment trokke 2 jonges eur kleier oet, smeerde de ganse gank en eurzelf in met aafwasmiddel en water en ginge zoe daor ut hoes heer boekschuve! Achteraaf krege we te hure det ze det op idder hoesfeest doon! We hebbe os kapot gelache! hahah

Zaoterdaagaovend laat is ozze nieje hoesgenoot aangekomme. Ik heb eur zondaagmorge pas ontmoet: weer ein Nederlands maedje!
Zondaag euverdaag hebbe we wat rondgelaupe langs ut strand, en hebbe we wat gedronke beej ein super fancy strandtent. Huul leuk um ens te zien gewaes!
's Aoves ware opniej oetgenudig door Nicky, de persoen dae alles veur os geregeld haet heej. Veurige waek zoeie we eigelijk daor heer gaon, maar toen ware dr twie branden vlakbeej eur hoes. Ut waas nog good te zeen, want rondum eur hoes waas alles zwart verbrand. Ze hebbe huul vuul geluk gehad det de buren geholpe hebbe um de brand te blusse en det ut neet is euvergespronge op eur hoes, want de brandweer is (nao mierdere kiere belle) noeit gekomme...
Dr is ontzettend vuul brand rondum Kaapstad. Ut is ontzettend druug doordet ut huul weinig raegend en door de harde wind is ut duk moeilijk um ut vuur in toom te halde.
Maar truuk naor de braai: ut waas ontzettend lekker en gezellig!! De locatie waor eur boerderie leet is werkelijk prachtig, en in de middle of nowhere, dus se kins as ut duuster is huuuul vuul sterre zeen!

Vanaovend is de letste aovend van ein van de hoesgenote, en dan gaon we lekker met z'n alle oetaete :)

Ik heb weer wat foto's toegevoeg van Namibië. Dit kier ein aantal foto's die we gemak hebbe in Kolmanskop, ut spookstadje.

Det waas ut weer veur noow!
Haije, kusjes en vuul leefs,
Mayke

Geschreven door Mayke.geniet