Hallo!

Vanmorge nog vruger opgestaon as gister. We woorte namelijk um 4.45 aor (!) opgehaold door ein tuktuk um naor Pidurangala Rock te gaon. Deze woue we beklimme um de zonsopkomst te gaon bekieke. Ut waas os aafgerooje um dit stök in ut duuster zelf te rieje, umdet ut ein gebied is waor, met name in ut donker, wilde olifanten rondlaupe en det kin dan geveurlijk zien.

Um 5 aor kwame we aan aan de voot van de berg. Zaklampjes op de kop en gaon! De lups ut ierste stök door ein boeddhistische tempel. Ut waas ech pikduuster, dus we ware bliej met os lempkes. Rechs naeve de tempel leep ein trap naor baove, en kwame we op ein volgend plateau. Vanaaf heej waas de waeg wat minder duudelijk. We stonde op ut punt um truuk te laupe, toen we ein andere toerist zooge aankomme: dan motte we wal good zitte! Ut ‘paad’ waas bes pittig, maar online had ik gelaeze detse soms wal wat rotse euver meus. Nao ein pittige toch kwame we op ein plateau en koste we neet vaerder. Toen woort al snel duudelijk det we ech neet good zoote, want in de vaerte zooge we lampjes....

Truuk naor onder dan maar. Ut ‘paad’ van de waeg umhoeg koste we neet mier vinde, dus door struuk en bosjes zien we maar gewoen umlieg gegaon. Ut beginpunt koste we nimmer vinde, maar op ein gegaeve moment hoorte we de waeg. Daor maar zoe snel meugelijk heer! In de buim hoorte we inens geritsel, en ein stök of 5 nieuwsgierige ape kwame os taegemoet. Gelökkig bleve ze gewoen in de buim en vluchtte ze weer toen we dichterbeej kwame.

Einmaal op de waeg zien we truuk gelaupe naor ozze tuktuk chauffeur, dae os de gooie waeg leet zeen, ein trap nog vaerder naor rechs, maar dae we in ut duuster neet hadde gezeen. Ut waas ein simpele klim naor baove, met veural gewoen trappe...
Baove aangekomme waas de zonsopkomst natuurlijk al lang gewaes, maar ut oetzich waas prachtig!

Toen waas ut ontbijte, inpakke en weer op waeg naor de volgende bestumming: Kandy!
Onderwaeg zien we gestop beej ein spice garden. Ein groete tuin waor allerlei soorte kruuje en plante greuije. We kriege oetleg van ein man dae os ouk vuul kos vertelle euver wat veur producte dr allemaol mei gemak waere, interessant! Ze gaon heej huul erg oet van de helende krachten oet deze plante.

De waeg ging steeds mier bergop, ein moeie route! Einmaal in Kandy aangekomme waas ut chaos. De schoele ware bliekbaar net oet en ut waas ein chaos van tuktuks, auto’s, motertjes, busse en kinder. Vuul file en dan ouk nog motte hellingtrekke. Det haet Jeroen good gedaon!

In Kandy zien we nog ef gestop beej Bahiravokanda Vihara, ein enorm boeddhabeeld baovenop ein berg vanaaf waor se ein waanzinnig oetzich hes euver de stad. Toen door naor de accommodatie. Dezeleet op ein berg, met ouk weer moei oetzich.

We hebbe os ef opgefris en zien toen naor ut centrum van Kandy gelaupe. Heej hebbe we de lokale mert bezoch. Vervolges urges gegaete um op tied aan te komme beej de tempel van de tand. Heej startte um half 7 ein boeddhistische ceremonie. Ut woort ingeleid met trommels en ein soort fluit. Op de 1e etage stonde allemaol minse in de riej um beej ein monnik offers te kinne inlevere. Um os heer allemaol biddende minse, ech super biezonder um mei te make!

Ut waas ein volle daag, maar wal weer ein leuke!

Geschreven door Mayke.geniet