Gooijendaag!

Vanmorge meuste we weer vruug op, want um 7 aor meuste we de boët hebbe um truuk te gaon naor ut vaste land. Op de boët waas weer ein groep Indonesiërs die met os op de foto wilde. Ein ganse fotoshoot. Ut blief toch raar.
Einmaol aangekomme op ut vaste land zien we richting Brastagi gereje. Ein prachtige route dae os iers langs ut Tobameer leidde, met prachtige oetzichte op ut meer.
De kins merke det dit deil van Sumatra qua vegetatie gans anders is as waor we ierder zien gewaes. Ouk is heej vuul landbouw; we kwame onder andere langs maïs- en mandarijnen/sinaasappelplantages.
Onderwaeg zien we gestop beej ut alde Batakpaleis en de Sipiso-Piso waterval.

Op ein gegaeve moment stapte we oet in ein klein dorp waor nog echt authentieke batakhoeze staon. Veur ozze maatstaven zien deze dorpen ech armoedig. De minse woene in kleine huuskes gemak van golfplaten, stein en andere rotzooi. Euveral leet ouk aafval, det is sowieso al opgevalle heej in Indonesië: de minse neme det allemaol neet zoe nauw.
We woorte daor ein maedje, Elsa, oetgenudig um eur hoes te bekieke. Ein ech traditioneel Batakhoes. Ze vertelde os det ze heej met 8 gezinne, in totaal 40 persoene, woene. Ein Batakhoes is huul groet vanbinne, maar toch waas ut raar um te beseffe det heej zoevuul minse in 1 hoes woene.

Ozze reis ging verder, en we kwame aan in Brastagi. Umdet ik mich nog steeds neet good veulde vandaag hebbe we os beej ut hotel laote aafzette. Alweer ein moeie accommodatie!
Pap, mam en Sjuulke zien nog naor de lokale mert gewaes, waor ze vuul fruit, greunte, maar ouk laevende diere verkochte. Sjuulke waas dr ein bietje door van slaag, laevende puppy’s en konijntjes in kleine hokjes.

We krege ein lekker Indonesisch diner in hotel en zien daornao lekker gaon slaope. Morge weer op tied op!

Haije!

Geschreven door Mayke.geniet