Hola!

Vanmorge woorte we rond 6 aor wakker door de opkommende zon. Heerlijk met ut geluud van veugel boete. Nao alle motte, kevers en andere biësjes te hebbe bevrijd hebbe we genaote van ein lekkere douche. We koste keeze oet standje kald of kald, maar met de hitte heej is kald douche wal te doon.
Nao lekker ontbeete te hebbe zien we naor ut stadje gelaupe, waor we ginge beginne aan ozze activiteit van vandaag: ein wandeling langs de watervalle. Achterop beej mototaxi’s hebbe we os laote aafzette beej de ierste: Pozo Azul. De rit waas efkes lekker oetweije, want ouk smorges vruug is ut heej metein al heit. Toen we aankwame waas ut nog röstig beej Pozo Azul. We hebbe lekker in ut water gestaon en wat foto’s kinne make. Toen we ozze schoon weer aan ut aantrekke ware kwaam dr ineins ein enorme groete groep minse aan, en toen we truuk lepe richting ut dörp kwame dr allein nog maar mier. We ware dus precies op tied!

Op waeg truuk naor ut dörp loog nog ein andere waterval: Cascada Escondida (verborgen waterval). De route naor deze waterval waas iets avontuurlijker, en we meuste ouk ein riviertje euverstaeke um deze te bereike. Maar det zörgde dr wal veur det dr haos nemes waas, heerlijk dae rös. Beej ein restaurantje vlakbeej hebbe we genaote van ein lekker sapje, veurdet we ozze waeg vervolgde truuk naor ut dörp. Daor kwame we langs ein dame die beej ein soort groete bbq stond met allemaol lekkere dinger. Daor zien we dus maar gestop en hebbe we oszelf getrakteerd op ein mini-lunch.

Ut plan waas um nog door te laupe naor ein andere waterval: Cascadas de Marinka (eigelijk 2 watervalle). Pfoeh, wat hadde we os in dae toch vergis. Ut waas flink bergop en toch wal langer as we hadde bedach, en det in deze hitte en al wat kilomaeters in de bein. Oeteindelijk zooge we ein bordje: nog 200 maeter. Nou, volges mich gebroeke die Colombiane heej andere aafstande as weej ofzoe, want det waas zeker gen 200 maeter! En dan nog steiler umhoëg as de res van de route!

Maar good, we ware dr! We zoote beej de 1e van de 2 watervalle net oet te puffe van de inspanning, toen ut begos te raegene. Ouk det nog!
Gelökkig deurde de bui deze kier maar kort, en nao ouk de 2e waterval gezeen te hebbe, hebbe we os door ein auto truuk laote bringe naor ut stadje. Vanoet heej nog truuk gelaupe naor de ecolodge.

Einmaal aangekomme op ozze kamer wou ik Jeroen op de hoëgte bringe det we ein kleine gast op ozze kamer hadde (ein klein salamandertje), toen dr inens baove mich ein lawaai oetbrook. Ut bleke 2 groëte vechtende gekko’s, dus de snaps wal: de paniek waas compleet! Ut ware gelökkig iets kleinere as die pap en mam in Indonesië op eur kamer hadde maar toch, ech chill vonde we ut neet. Gevolg: we stonde as 2 idioten met handdeuk door de kamer te zweie um de gekko’s te verdrieve, en det lökte!

‘S aoves hebbe we in de ecolodge gegaete. We ware hielemaol kapot, dus lekker op tied naor bed (nao nog ein kier ut gekko-verdrief-ritueel te hebbe oetgevoerd). Morge motte we dr weer vruug oet!

Geschreven door Mayke.geniet