Hallo!

Vanmorge zien we vruug (rond half 6) geland op ut vleegveld van Colombo. Al snel hadde we ozze backpacks, en kos ut ierste avontuur beginne: ozze transfer zeuke. Cees, ein Nederlander dae in Sri Lanka woent en dae ozze tuktuk regelt, had geregeld det ein chauffeur os zou ophaole. We kwame boete en ut waas ein groete chaos aan minse die os ein taxirit aanbode. De wermte/vochtigheid kwaam ouk ech inens op os aaf, en daor lupse dan met toch ein behuurlijke bepakking. Nao wat op en neer geapp met Cees (waorveur we weer truuk meuste naor de ingang van ut vleegveld ivm wifi) zooge we toch eindelijk ozze chauffeur. Op naor Negombo!

We raakte aan de praot met de chauffeur, en dae bleek oeit in Berkel-Enschot te zien gewaes. Of all places.. waat ein toeval!
De chauffeur dropte os beej Cees, waor we ein lesje tuktuk rieje krege. Bliek toch lastiger te zien as det ut dr oet zuut! Met ozze Sri Lankaanse riebewieze zien we vervolges naor os hostel gereeje. De kamer waas nog neet klaor, dus hebbe we ef lekker op ut terrasje aan ut water gezaete. Door waas ein kakofonie aan vogelgeluuje te huure, maar vaerder waas ut heerlijk röstig. Ef lekker beejkomme! Inens zooge we in ut water ein mega hagedis (laes +/- 1 maeter), vet!!

Toen toch maar op paad, en beej un klein restaurantje ontbete. Vervolges zien we vaerder door Negombo gelaupe, en kwame we oetintelijk aan beej de vismert. Heej ligge lange rieje met allerlei soorte vis te druëge in de zon. Ein stökske vaerderop waas ouk nog de verse-vis mert waor we ef euverheer zien gelaupe.

Op waeg truuk zien we, nao lang zeuke veur ein kald pilsje, gestop beej ein hostel met ein moeie tuin aan de zieë. Heej hebbe we genaote van os ierste Sri Lankaanse biertje. Lekker!

Saoves zien we gaon aete beej Tuktuk wine&dine. We hadde neet gereserveerd, dus waas dr allein nog plaats aan de bar. Dr waas leuke livemuziek en ut aete smakte erg good. We hadde ein kottu chicken en ein lagoon crab curry. Allebei erg lekker, al is ut ontlede van zo’n krab vuul werk!

We gaon noow lekker slaope, want tiedes de vluch hebbe we allebei neet ech ein aug dich gedaon. Ein nach doorhaole waas veur os allebei lang geleeje, haha!

Geschreven door Mayke.geniet