Hallo!

Nou wat ein nach. De bedde in de homestay ware neet ech bedde te neume. Ut bleke opgevouwen daekens te zien en daor waas neet idderein zoe blie mei. Ondanks det ut veulde alsof ik op de grond loog, heb ik verrassend good geslaope.

Nao ut ontbijt van pannekoekjes met honing waas ut tied um de homestay te verlaote. We woorte oetgezweid door de kiendjes en zien de berg umlieg gewandeld. Ut haet flink geraegend gister dus ut water van ut riviertje stond flink hoeg, waordoor we naate schoon hebbe gekrege. Gen probleem, want de oetzichte heej zien ut zeker waerd!

Onderaan kwame we beej ein waeg waor we woorte opgewach door ut busje. Onderwaeg koste we naor de wc, maar ut ware van die Franse, dus heb ik toch maar euvergeslage. Helaas waas nao ein tiedje toch ech nood aan de man, en bin ik met 2 andere erges anders oetgestap um toch maar te gaon plasse. En jao huur, weer van die gate in de grond. Naodet we naor elkaar hadde gerope wie we dit ginge doon zonder euver ozze bokse heer te plasse, ware we dapper genog um maar deep te squatte en snel os plasje te doon. Toch weer ein kleine euverwinning!

Oetintelijk zien we beej ut resort aangekomme waor we vannach slaope. Toch wal efkes fijn wat mier luxe! 2 persoenskamers met eigen badkamer. En ut zuut dr ouk kei moei oet!
We hebbe gauw ozze spulle weggezatte, want de volgende activiteit stond al op de planning: ein boottochtje.

Nou det waas toch wal ein avontuur. We koste met 2 man in ein buutje dae dan woort geroeid door ein Vietnamese man of vrouw, weej hadde ein vrouw. Ozze gids waarschuwde os van te veure nog det ut water hoeg stond, dus det we in de grotten good op ozze kop meuste passe. En hoe! We meuste op sommige stukke bijna plat ligge um dr veilig onderdoor te kinne. Toen we de 1e grot oetkwame begos ut inens te raegene. En neet zoemaar te raegene maar ech ein stortbui. Os vrouwtje goof os gelukkig ein paraplu, maar al snel waas dudelijk det det neet zoevuul zin had, en ware we volledig doorweik. Toch waas ut hartstikke leuk!!

Naat zien we truuk naor ut resort gelaupe. Nao lekker te hebbe gedoucht en ozze kleier op de hand te hebbe gewasse, waas ut tied veur ut diner. Ik keek nog ein letste kier naor mien bed, en toen zoog ik iets bewaege op de grond. Aaaaahhhh ein KIKKER. Lichte paniek, want hae sprong ouk nog ens weg. Gelukkig kwaam ozze reisleider os redde en haet hae de kikker weggehaold.

Ut aete waas weer lekker. En we begoste net met ein potje poolen en andere dinger toen inens ut leech oetging: stroomstoring. Zaklampe aan en toch maar door waor we mei bezig ware. Ut bleef duuster en nao nog wat andere spelkes te hebbe gedaon zien we truuk gegaon naor ozze kamers.
Daor ontstond ut volgende probleem: ein groete spin op ut bed van Annelotte. En weer woorte we gered door de reisleider.

Ouk op de kamer is gen straum, dus ut is good heit heej. Toch maar probere lekker te gaon slaope.

Haije en tot morge!
Vuul leefs,
Mayke

Geschreven door Mayke.geniet