Hallo!!

Vandaag zien we met ein georganiseerde reis vanoet de backpackers naor Lesotho gegaon. Iers wat algemeine informatie euver Lesotho:

• Lesotho is ein van de ermste lande ter wereld
• Lesotho wuurd umringd daor Zuid-Afrika, en grenst dus maar aan 1 land
• Lesotho is ongevier aeve groet as Belgie en haet 2.2 miljoen inwoeners
• Euver ut algemein hebbe de minse in Lesotho gen stromend water in hoes

Vanmorge um half 8 zien we same met nog 2 andere gasten en ozze gids in ein busje naor Lesotho gereje. Jeeej weer grenscontrole, ik heb noow 4 lande in Afrika bezoch :)
Tussen de grens van Zuid-Afrika en Lesotho kwame we al de 1e inwoener oet Lesotho taege: te paard, want det is wie de meiste minse zich in Lesotho verplaatse. Al snel koste we merke waorum, want de waege in Lesotho zien werkelijk DRAMATISCH. Ik waas ontzettend blie det Liko en ik neet met ozze Kia Picanto daorheer zien gegaon, want ik dink neet det os autootje det had euverlaef.

De 1e stop waas beej ein basisschoel. We krege de gelaegeheid um gewoen ens rond te laupe en rond te kieke. In de meiste klaslokale zoote kinder, maar ik heb haos gen docente gezeen. De kinder vonde ut ontzettend leuk um op de foto te gaon, en dan vervolges alle foto's te bekieke.
Vervolges hadde we ein gesprek met emes dae op de schoel werk. Hae haet os verteld euver de geschiedenis van Lesotho en de schoel, en ouk euver wie ut tegewoordig is. Schokkend feitje: minder as 35% van de kinder in Lesotho geit oeteindelijk naor de middelbare schoel. Ouk krege we te hure det dokters smiddaags um 16.00 h sloete, en in de weekende en op feestdage neet werke. As dich dus iets gebeurd in Lesotho nao 4 aor of in ut weekend, hesse dus ein groet probleem en kinse neet geholpe were....

Daornao hebbe we ein korte wandeling gemak in de berg en krege we rotsschilderingen te zeen. Vervolges nog efkes truuk naor de schoel, waor de kinder net pauze hadde en boete ware. Sommige stonde beej de waterkraan, andere ware aan ut voetballen of un ander spel aan ut doon. Erg moei um te zeen wie gelukkig die kiendjes daor zien, zeker umdet weej weite det ze eigelijk gen toekoms hebbe...

Daornao zien we doorgereje naor ein 'traditional healer'. Dit waas ein vrouw die middels plante, kruiden, etc minse baeter mak. Ze haet os verteld hoe ut gekomme is det zeej 'traditional healer' is gewore en waat ze daorveur haet motte doon. Vervolges krege we zelf ouk nog de kans um eur vraoge te stelle. Erg interessant mot ik zegge!
Ten slotte zien we nog naor ein hoes gereje waor we traditioneel aete oet Lesotho te aete krege: pap met greunte. Dit aete de minse daor 3x per daag, iddere daag (soms met ein bietje vleis)... Ut is bes wal lekker mot ik zegge, maar ik zou dr neet aan motte dinke det det ut enige is watse iddere daag its... Gelukkig krege we dr wal ein lekker biertje beej, gebrouwen in Lesotho!

Vervolges zien we truuk gereje naor de backpackers. Ut waas ein erg indrukwekkende daag!

Haije en tot morge!
Kusjes en vuul leefs,
Mayke

Geschreven door Mayke.geniet