Hallooo!!

Wauw wauw wauw WAUW. Waat ein daag vandaag. Ik zal maar beej ut begin beginne.

Vanmorge zoeas iddere daag weer op tied op. Aankleie, opmake, backpack inpakke en ontbijt. Ik had ein omeletje besteld, maar kreeg scrambled eggs, gen probleem, ouk prima veur mich. Ik waas lekker mien ei op mien bruudje aan ut legge, toen ik inens iets zwarts taege kwaam.... EIN SPIN!!! Aaahhhh. Oke det is toch neet hielemaol de bedoeling. Ik netjes truuk naor de bar, en ik kreeg efkes later netjes ein nieje portie scrambled eggs met ein bruudje.

Nao ut ontbijt verzamele. Op ein gegaeve moment kwame dr 16 manne aangelaupe. Ozze chauffeurs veur vandaag, want we zulle vanoet Hué naor Hoi An reizen achterop motors!! Toch wal ein bietje spannend, we ware os al aan ut aafvraoge wie det zou gaon met ozze backpacks. Deze woorte netjes achterop de motor gevonde. Helm op en tied um te gaon.

Toch wal ein bietje akelig in ut begin huur, achterop zonne motor. Zeker asse wets wie ut dr in ut verkier aan toegeit heej. Ozze 1e stop waas ut waterpark waor we gister neet naor binne koste. We kwame via ein andere route en ouk op ein andere plaats oet. Beej un soort zwumbad met tribune dr umheer. Ech bizar um te zeen det dit gans verlaote is. We koste neet vaerder ut park verkinne, want dr kwaam al ein bewaker aan...

Truuk op de motor en gaas! Ut veult heerlijk um zoe lekker door ut landschap te scheure. Volgende stop: ein prachtig meer. Lekker um ouk efkes de bein te kinne strekke, want wuurs toch wal stief op zonne motor.

Vervolges zien we doorgereje naor de Elephant Springs. Ein soort klein natuurlijk waterparkje. Heej hebbe we lekker gezwomme. Heerlijk efkes aafkeule want ut is weer heit vandaag! Idderein is ouk verbrand...

Heejnao zien we naor ut strand gereje waor os ein lekkere lunch stond te wachte. Vervolges zien we de berg ingereje. Wauw ech fantastisch! Zoe ontzettend moei! En ut is al hielemaol ein geweldige ervaring op ein motor.

Nao weer ein korte stop zien we doorgereje naor Danang. Heej staon langs de waeg euveral de meist luxe resorts, en waor nog niks steit daor wuurd wal gebouwd. Ech onveurstelbaar! We stopte beej ein stopleech en inens hoort ik ein soort schrapend geluud. Ein van de motore waas gevalle!! Det waas wal efkes schrikke, maar gelukkig veel ut mei, en had ut maedje allein eur kneen aope. Efkes later toch weer vaerder. We kwame oet beej de Marble Mountains, wal moei, maar de kos merke det idderein wal muug begos te were.

We zien doorgereje naor de eindbestemming: os hotel in Hoi An! Nao heerlijk te hebbe gedouche zien we naor ut centrum gelaupe um te gaon aete. Hoi An is ech onzettend leuk. Euveral hange lampionnetjes waat zurg veur ein super gezellige sfeer. Nao ut aete zien we met ein deil van de groep nog waat gaon drinke in ein irish pub, gezellig!!

Haije en tot morge!
Vuul leefs,
Mayke

Geschreven door Mayke.geniet