Hallo!

Vanmorge hebbe we weer röstig aan ontbete, en zien we nog ef naor ut daakterras van de accommodatie gegaon, waor se ein moei oetzich hes op de riesvelde en de umgaeving. Vervolges de tuktuk ingelaaie en op waeg naor de volgende bestumming: Sigiriya.

Iers meuste we nog wal ef tanke, en toen ging ut efkes mis. Jeroen noom de bocht net te kort, en de achterkant van de tuktuk schraapte langs ein paolke. Ai, det klonk neet fijn. Gelökkig liek de schade op flinke krasse nao mei te valle, en koste we ozze waeg gewoen vervolge.

Ut waas weer ein moeie route met verschillende soorte umgaeving: riesvelde, jungle, maar ouk groete meren vol met lotusbloome. Beej eine zien we gestop waor we koste zeen det minse aan ut visse ware, lotusbloome aan ut plukke ware en zich aan ut wasse ware. Nao ein rit van in totaal ongevier 2,5 aor kwame we aan in Sigiriya. Ein klein hobbelpaad brach os beej de homestay waor we de kommende 2 nachte blieve. Ein leuk hoes midde in de natuur met ein fijn zwumbad. Waat ein heerlijke plek! In de andere kamer verblief ein Italiaans gezin met 2 jonge kinder. We kwame met eur aan de praot, en ze blieke al sinds september de wereld euver te reize, hoe biezonder!

We wille in Sigiriya geer ein kaokles doon, en ut bleek det de Italiaanse familie vanaovend urges heer ging waor we mei naor toe meuge.
We hebbe smiddaags gelunch en nog lekker aan ut zwumbad gelaege.

Toen met de tuktuk ut dörp in. We kwame oet beej ein klein golfplate huuske waor ein Sri Lankaanse dame veur os stond te kaoke. Gen kaokles, maar mier ein homecooked meal. Hielemaol prima! Ze had zelf ein soort fornuus gemak van klei waor ze dan met vuur op kaokte. Ze had allerlei gerechte bereid: aardappeltjes, bietjes, koolsalade, wortelsalade, verschillende greunte, eiercurry, iets met jackfruit, ries, un soort chipjes, en dan heb ik ut misschien nog neet allemaol geneump.
Ut waas in idder geval heerlijk, en super gezellig met ut Italiaanse gezin. De kiendjes zien 7 en 5, en de aldste krieg noow van de moder les. Ut zien leuke en kinder en ze gedrage zich super netjes, en det zonder iPad of telefoon :).

Beej truukkomst in de accommodatie hebbe we nog ef ein spelke gedaon, en noow gauw naor bed. Morge motte we weer vruug oet de vere!

Geschreven door Mayke.geniet