Hallo!

We ware bliej toen we vanmorge de gordiene aope deeje: de mist is weg, en ut oetzich vanoet ozze kamer is ech waanzinnig. We hebbe al ein paar accommodaties gehad met moei oetzich, maar dit is by far ut moeiste oetzich wat we hebbe gehad.

Nao ein lekker ontbijtje hebbe we ozze wandelschoon aangetrokke veur de hike van vandaag: Ella Rock. Ut ierste gedeilte meuste we euver ut spoor laupe, iets wat heej in Sri Lanka ech super normaal is um te doon. Daornao meuste we ein stökske door de theeplantages, en vervolges steeds vaerder umhoeg. We lepe same op met ein Engels koppel, Sam en Kate, waor we gedurende de hike gezellig mei hebbe geklets. Ik had online al gelaeze det ut mekkelijk is um heej de waeg kwiet te rake, doordet locals pade blokkere en vervolges als gids wille fungere um dich naor baove te helpe. Daor wille ze natuurlijk geld veur. Ondanks de maps.me en tips in blogs, zien we toch de waeg weer kwiet gerak. Onderwaeg kwame we ein vrouw met ein kind van 8 taege die ouk de waeg kwiet ware. De pade ware soms pittig, en dr ware ouk wat stökke waor vuul bloedzuigers (leeches) zoote. Gelökkig hadde we allebei ein lange boks aan!

Oetintelijk toch de top bereikt, maar.... mist! Van ut moeie belaofde oetzich waas weinig te zeen. Toch wal ein teleurstelling. Nao ein tiedje zooge we gelökkig det de wolke wegtrokke, en woorte we getrakteerd op ein prachtig oetzich. De route truuk ging gelökkig ein stök mekkelijker, en we zooge ouk precies waor we op de heerwaeg verkierd ware gelaupe. En det paad waas inderdaad geblokkeerd. Ein local zei det ut kwaam door ein ‘landslide’, maar de buim die dr looge ware wal erg rech aafgebraoke...

Smiddaags hebbe we gelunch in ut stadje, en vaerder op ut balkon van de kamer gerelaxed. Met dit oetzich hesse vaerder neet vuul nudig!
Op aanrooije van Kate en Sam zien we saoves gaon aete beej The Clay Pot. Dit restaurantje leet aan ut spoor, en we kwame dr achter det ut vanoet ozze accommodatie ut mekkelijkst is um gewoen euver ut spoor te laupe. Met ozze koplampjes ginge we op paad. Wat zien we toch bliej me die dinger! Beej The Clay Pot servere ze heerlijke Sri Lankaanse gerechte, misschien wal ut lekkerste wat we tot noow toe hebbe gehad!

Geschreven door Mayke.geniet