Hallo!

Gister krege we ozze tuktuk truuk en bleek de benzine haos op te zien. Van de eigenaar van de accommodatie krege we ein fles benzine, zoedet we in idder geval ein tankstation kinne bereike. Onderwaeg daorheer bleek ein waeg aafgeslaote te zien, dus meuste we ein flink stök umrieje. Neet erg, want de umgaeving waas prachtig!

Vervolges hebbe we ozze tuktuk urges geparkeerd, en wae kwaam dr net aangelaupe naor de tuktuk dae naeve os stond? Sam en Kate! Hoe toevallig?!
We volgde ut paad naor de Nine Arch Bridge. Dit is misschien wal de bekindste en meist gefotografeerde plek van Sri Lanka. Wie de naam al zaet is dit ein brök met 9 bogen, waor de trein euverheer ried. We kwame aan beej ein viewpoint waor we ein kokosnoot gedronke hebbe, en lekker op ein benkske koste geneete van ut oetzich op dr brök. Nog gen vief minute later hoorte we in de vaerte ein trein aankomme, waat ein toeval! En leuk um te zeen vanaaf waor we stonde.

Toen de trein veurbeej waas leepe we ut paad vaerder umlieg, totdet ik inens iets gries zoog veurbeej glije ein stökske vaerderop... ein slang!! En gen kleine, maar ech ein flink dieke van misschien wal 1,5 maeter lank. Ieuw bah! We dörfde efkes neet vaerder, maar gelökkig kwame dr van de onderkant minse met ein Sri Lankaanse gids aan. Hae vertelde os det de slang neet giftig waas, dus toen zeej gepasseerd ware zien we snel naor onder gespurt. We hebbe nog ef euver de brök gelaupe, en zien toen via ein andere route weer truuk gelaupe richting de tuktuk. Heej pakte we vervolges weer ein ander paad um Little Adam’s Peak te beklimme. Veur de echte klim kwame we langs ein restaurant van ut 98 Acres Resort, met infinity pools en al. Prachtig!

De klim zelf waas vervolges redelijk simpel, met trappe umhoeg en met ongevier 20 minute stonde we op de top, deze kier zonder te verdwale. Ouk heej weer moei oetzich!
Truuk aangekomme beej de tuktuk beslote we nog naor ein waterval te rieje dae os waas geadviseerd. Ein half aor later parkeerde we de tuktuk, en meuste we ut letste stök nog laupe. We hadde ut ein bietje verkierd ingeschat, want ut waas nog wat vaerder as we hadde verwach. De waterval waas gelökkig moei, en Jeroen haet dr efkes gezwomme.

Saoves hebbe we weer beej The Clay Pot gegaete, ut waas zoe good bevalle gister!
Morge gaon we Ella alweer verlaote. Jaomer, want we vinde ut ech huul leuk heej. We ware geer wat langer gebleve!

Geschreven door Mayke.geniet