Hallo!

Vanmorge zien we weer op tied opgestaon veur surfles 3. We ginge, net as de andere daag, naor Peanut Farm, ein van de surfplekke geschikt veur beginners. Doordet nog neet alle surfplekke ‘werke’ waas ut heej de aafgelaupe daag, en dus ouk vandaag, bes drök. De zië waas vandaag wat wilder as de aafgelaupe 2 daag en ouk de stroming waas wat sterker. Heejdoor ware dr ouk minder vuul gooije golve, dus as dr dan ens ein gooije golf waas, ginge dr metein huul vuul minse, en meuse de golf deile. Det is bes lastig asse nog neet kins sture! Helaas ging ut heejdoor vandaag beej os allebei minder good as gister.

Nao de surfles hebbe we ontbete, en zien we naor ein klein bekkerke gelaupe, um wat aete te kaupe veur vanmiddaag. We gaon vandaag namelijk op safari! Um 1 aor stond dr ein groëte jeep veur os klaor. In ongevier ein eurke reeje we naor Kumana National Park. Vlak veur de ingang zooge we midde in ein aope veld al ein olifant! Ondanks det we die in Hurulu al vuul gezeen hebbe, blief ut speciaal. Beej de ingang tickets gekoch, en we koste weer op waeg!

Al snel stopte ozze jeep en zooge we verschillende moeie vögel, en ein kleine krokodil op ein eilandje! Ech ongeluifelijk hoe dae gids zoe snel en al riejend biëste kin spotte. Vaerderop stook dr inens ein groëte groep buffels de waeg euver, en beej ein meertje zooge we nog net wie ein krokodil ut water in gleed. In de baum aan de rand van ut meertje zoote aapjes, en volges de gids wachtte de krokodil noow op ut moment det hae ein van die aapjes kos pakke. Det hebbe we neet gezeen, want we reeje weer vaerder. Onderwaeg zooge we herten en nog mier vögel, veural huul vuul pauwen. Die zuuse heej in de umgaeving trouwes zoewiezoe huul vuul!

Beej ein ander meer zooge we ouk weer ein groete groep buffels die ut water inginge. En op de kant loog ouk weer ein krokodil. Volges de gids zou un krokodil ein groete buffel neet snel aanvalle, allein de kleintjes laupe wat mier gevaor.

We kwame oetintelijk beej un soort gebouwtje oet waor allemaol jeeps stonde. Weej dachte det se heej misschien naor de wc kos, maar niks bleek minder waor. Heej loog ein luipaard!!! Daor loog hae dan, midde op ein meurke, vol in ut zicht. Zoe vet!

Ten slotte reeje we nog naor ein oetzichtpunt. De umgaeving van dit park is ech prachtig, met mier water en vuule moeiere oetzichte as in Hurulu. Ozze jeep had trouwes nog wal ein paar kier probleme, hae rakte namelijk steeds euververhit, waordoor we dök meuste stoppe, met name ouk toen we weer ut park oet ginge. Heejdoor haet ut letste stök lang gedeurd. Maar we zooge in ut duuster nog wal ein vos en huul vuul hazen.

Al met al weer ein fantastische daag!

Geschreven door Mayke.geniet