Hola!

Vanmorge hebbe we ozze backpacks nao ein lekker ontbijtje ingeleverd beej de receptie, en allein ozze daagrugzak meigenaome. We zulle vanaovend namelijk neet slaope beej de ecolodge, maar in ein tent in ut Tayrona National Park!

We hebbe de bus gepak dae os nao 3 minute al dropte beej de ingang van ut park. De gang van zake heej waas erg biezonder. Iers kwame we beej ein loket waor we de (verplichte) verzekering meuste kaupe. Daornao meuste we naor ein ander loket veur de entree-tickets, heej krege we ein bonnetje waormei we weer naor ein ander loket meuste um te betale, um vervolges weer truuk te gaon naor ut ierdere loket um ut daadwerkelijke entreebewies te kriege. Zoeas se wal kins laeze: Colombiaanse efficiëntie...

Maar ach, we ware binne! Heej hebbe we ein klein busje gepak naor ut echte startpunt van de route. Heej hebbe we iers ein kleine andere route, 9 Piedras, gepak. Ut rundje ging door de jungle en we kwame langs allemaol groete rotsformaties. En we zooge heej ein capibara! Helaas waas hae te snel oet ut zich um ein foto te kinne make.

We kwame truuk beej ut startpunt waor de route begos richting os eindpunt van vandaag: Cabo San Juan. De route waas good te doon, met vuul vlonders en gooije pade. Maar ut waas weer bloodheit, en vochtig! Binne no time ware gans doorweik, ech neet lekker. Ut ierste deil van de route ging veurnamelijk door de jungle, waor we haopte aapjes te kinne zeen, maar helaas, neet gezeen. Vaerder kwame we langs moeie strande en stökke met vuul palmbuim. Beej ein lagune hebbe we ozze lunch opgegaete, en we zooge gekke drievende dinger in ut water. Ik had gelaeze det dr urges in ut park krokodille koste zitte, maar det zou toch neet heej zien? We leepe vaerder, en ein stökske vaerderop stond toch ech ein bord: Beware of caiman! Zulle ut dan toch krokodille zien gewaes?!

Nao in totaal ruum 3 aor gelaupe te hebbe kwame we nogal euververhit aan beej Cabo San Juan. Ein moei strand met op ein rots de bekinde Mirador. In deze Mirador hange hangmatte waorin se kins slaope, en ein stökske van ut strand aaf staon de tente. Beej aankomst hebbe we efkes rondgelaupe. Ouk heej leet ein lagune waor krokodille kinne zitte, maar heej hebbe niks kinne spotte (ouk wal ein fijn idee).

Vervolges hebbe we lekker gelunch en genaote van ein heerlijk kald Colombiaans pilske. De res van de middaag hebbe we gezwomme in de zië en lekker geluierd op ut strand. Daornao gedouch onder kalde en vieze douches, maar we veulde os veur 5 minute weer efkes fris. Daornao metein muggespray op en de zweits dich heej weer hielemaol de pleuris... ut aete waas prima, en nao wat spelkes te hebbe gedaon waas ut tied um lekker te gaon slaope. Beej ut wc gebouw stonde we ozze tand te poetse, toen dr plotseling met ein flinke klap ein biës taege de speegel aanvloog: ein soort vleegende sprinkhaan, van misschien wal 20 cm groet!! Ieeeeeeee
We zien maar snel truuk gegaon naor de tent, waor we haopte det ut un bietje had doorgeweid met de flappe umlieg. Maar helaas, ut waas snikheit! Lekker zweitend slaope dus vannach...

Geschreven door Mayke.geniet