Hallo!

Vandaag vertrekke we naor Ella, met de trein. Vanmorge zien we op tied vertrokke naor ut treinstation Nanu Oya waor de trein zal vertrekke. Ein chauffeur zal ozze tuktuk heej oppikke en naor Ella rieje, zoedet we vanaaf daor weer met de tuktuk vaerder kinne. Ruum op tied kwame we aan op ut station, en efkes later waas daor de chauffeur.

Op ozze tickets stond det de trein um 8.54 zou vertrekke, en we ware mier as ein half aor van te veure al daor. Op ut treinstation zooge we op ein bord det de trein pas um 9.20 zou komme. Achja, dan maar efkes wachte op ut perron. Det efkes bleek wat langer te deure as verwach, want oetintelik kwaam dr trein pas taege ein aor of 11 aan...

De treinreis tusse Nuwara Eliya en Ella steit bekind as ein van de moeiste treinreize ter wereld. We hadde gooije plaatse. In de achterste coupé van de trein, met steul die oetkieke op de achterroet zoedetse ein moei oetzich hes. De reis waas prachtig, we reeje weer door theeplantages en moeie berglandschappe. Ut is biezonder um te zeen wievuul heej nog handmatig wuurd gedaon, bijveurbeeld ut umlegge van de wissels. Op ein gegaeve moment zooge we ouk ein groep manne ein soort wagentje met daorop allemaol balke euver ut spoor douwe. Efkes later stopte de trein beej ein station, en woort det kerke met ein touw achter aan de trein gebonde. De manne spronge op de ker, en zien zoe ein gans stök met ozze trein meigelift. Zoeiets kinse dich in Nederland toch neet veurstelle!

Halverwaege de reis begos ut mistig te were, en koste we steeds minder zeen van ut oetzich. Jammer, want dit zou juus ut moeiste deil van de reis motte zien. Aangekomme in Ella bleek ut ouk daor flink mistig. We vonde al snel ozze tuktuk, maar krege te hure det dr inens probleme ware met ut starte. Raar, det hadde we nog neet ierder gehad. Ein chauffeur leet zien wie we um toch aankrege, en we koste op waeg naor de accommodatie. Deze hadde we geboek veur ut moeie oetzich, maar vanwaege de mist koste we daor jaomer genog niks van zeen vandaag. We krege van Cees (waor we de tuktuk van hure) te hure det we de tuktuk toch meuste laote make, ein mannetje kwaam um ophaole en saoves weer truuk bringe. Vanwaege de mist bood hae aan um os naor ut dörp te rieje, en det we dan ut beste met ein andere tuktuk truuk koste gaon. Hae kump dan morge ozze tuktuk truuk bringe. Ein good advies, want de kins ech nog gen 2 maeter veuroet kieke!

We zoote lekker te aete toen ik inens iets op mien bein veulde. Ik sloog ut weg, en zoog ut blooje. Ik keek op de grond en zoog ein klein soort wormpje wat zich as ein soort rupsje veuroet bewuug: un bloedzuigertje. Ieuw.... Bliekbaar had hae mich op mien andere bein ouk al te pakke gehad, want ik zoog ouk daor ein wondje en blood op mien boks. Gelökkig kinne ze gen kwaod!
Haopelijk trek de mist vanach weg en hebbe we morge mier oetzich!

Geschreven door Mayke.geniet