Hallo!

Vanmorge hebbe we heerlijk aan ut water ontbete. Ozze hagedis-vrind hebbe we ouk weer gespot. Vervolges hebbe we ozze tuktuk ingelaaie en koste we op waeg. Jeroen begos (gelökkig veur mich) met rieje. Det waas wal ef winne! Ut schakele waas in ut begin bes lastig, en midde op ein kruutspunt sloog de moter aaf. We krege de tuktuk nimmer truuk in neutraal. Daor stonde we dan... gelökkig kwaam ein Sri Lankaan os al snel te hulp, en nao de tuktuk iers aan ut rolle te bringe lökte ut um gelökkig wal. Noow koste we dan ech op waeg.

Ut rieje in Sri Lanka is ef winne. Aan de linkerkant, en in de stad euveral scooters, auto’s en busse die dich via alle kante probere in te haole. En det terwijl se ouk nog bezig bis met ut ontwijke van voetgangers en hund op de waeg. Mier naor ut noorde woort ut steeds röstiger op de waeg, en woorte de oetzichte ouk steeds moeier. Heej meuste we dan weer wal mier oplette det dr gen koeie of hagedisse de straot euverstoke. En we hebbe zelfs apen gezeen!

Onderwaeg zien we gestop beej ein klein restaurantje waor we rice&curry hebbe gegaete. Ut waas bliekbaar populair onder de lokale bevolking want ut waas ein komme en gaon van minse.

Aan ut ind van de middaag kwame we aan in Anuradhapura. We hebbe heej ein leuke accommodatie met ein prachtig oetzich op de riesvelde. We hebbe saoves beej de accommodatie gegaete, erg lekker maar ouk bes spicy!

Ondanks det ut veural ein reisdaag waas, hebbe we ein kei leuke daag gehad same.

Geschreven door Mayke.geniet