Hola!

Vandaag vertrekke we naor de letste bestumming van ozze rondreis in Colombia: Cartagena!
We hebbe vanmorge röstig aan gedaon, en hebbe rond 10 aor de bus gepak. Ut bleek ein directe bus te zien, det hadde we neet verwach, ein gelukje dus! Maar det waas van korte duur, want toen we in Santa Marta aankwame, schrieuwde ein busmedewerker det de minse die naor Cartagena ginge snel de bus oet meuste. Dus toch ein euverstap. Helaas naor ein iets minder comfortabele bus as de iërste, maar good, we ware weer onderwaeg. Tenminste, totdet we ouk in Barranquilla stopte, en daor (met onbekende rede) zo'n 1,5 aor stil hebbe gestaon. Gelökkig hadde we deze kier wal airco in de bus!

Nao ein lange rit kwame we oeteindelijk dan toch aan in Cartagena, waor we met ein Uber naor de accommodatie zien gebrach. De accommodatie leet in de wiek Getsemani. Ein super leuke en gezellige wiek vlakbeej ut alde centrum, met smalle gekleurde straotjes, vuul restaurantjes en winkeltjes en ein gezellig plein. We zoote 's aoves lekker te geneete van ein shared dining, toen plots de straum oet veel. Inens waas ut pikduuster! De medewerkers ware dit bliekbaar wal gewind, want al snel kwame ze aan met allemaol kaarse zoedet we toch vaerder koste aete. Bes romantisch! Ut deurde oetintelijk neet huul lang veurdet de leechte weer aanginge :).

Op waeg truuk naor de accommodatie waas ut ein drökte van jewelste in Getsemani. Euveral leepe minse, zoogse kraompkes met streetfood (waat dr erg good oet zoog!), en ware kleine 'terrasjes' met plastic steulkes en taofelkes waor ze dich probeerde te verleiden met happy hour cocktails. Door de lange reis vandaag ware weej kapot, dus we zien lekker naor bed gegaon.
Morge weer ein daag!

Geschreven door Mayke.geniet