Hola!

Vandaag hebbe we de groete stad verlaote, en gaon we weer de natuur in. We gaon namelijk naor Minca!
Minca leet ein stök noordelijker as Medellín, dus hebbe we vanmorge ein binnelandse vluch genaome naor Santa Marta. Op ut vleegveld verleep alles vlekkeloos, en ouk de vleegreis zelf waas maar kort. In Santa Marta aangekomme kwaam de bagage ouk al snel, dus we koste snel op naor Minca.

We leepe door de deur naor boete, en leepe vol de hitte in. Jeetje, waat is det heej anders as waor we tot noow toe gewaes zien! Wermer, maar veural vuul vochtiger en drökkender.
Boete beej ut vleegveld verwachtte we det dr os wal busse stonde op de wachte, maar niks waas minder waor. Ut waas zoe röstig, ech huul raar. Nemes sprook Ingels (zelfs politie-agente die dr stonde neet...), dus nemes kos os ech helpe. Oetintelijk zien we same met ein Duits maedje in ein auto gestap naor Minca en hebbe we de koste gedeild.

De waeg naor Minca waas verrassend good, en nao ein half eurke woorte we veur de deur van ozze ecolodge aafgezatte. In de hitte meuste we met ozze backpacks nog ein flink aantal trappe beklimme, dus gans bezweit kwame we beej de receptie aan. We woorte hartelijk verwelkomd en naor ozze kamer gebrach. Wederum flink wat tredes umhoëg. We slaope op de baoveverdeeping van ein schattig huuske, waat gans gemak is van klei en holt. De badkamer leet achter ut huuske. Boete. Met ein “laevend” eco-toilet. Ein échte ecolodge dus! Det wuurd wat :).

Nao efkes oet gezweit te hebbe woue we richting ut dörp laupe um te gaon lunche. We stonde op ut punt um ozze schoon aan te doon, toen ut inens kei hard begos te raegene en onwere. We hebbe dus maar in de hangmat en op ut benkske op os terrasje gechilld totdet ut rond 4 aor weer druug waas. De route naor ut dörp is door de jungle, bergop en bergaaf, lekker zweite dus in deze hitte weer! Ozze lunch woort mier ein vruug diner, beej ein leuk restaurantje genaamd Lazy Cat (det deej os wal dinke aan Snoes), waor we weer vuul kolibries hebbe gezeen.

We hadde bedach um veur ut naor bed gaon nog ef lekker te douche, maar nao ein blik geworpente hebbe in de douche hebbe we det toch maar neet gedaon. Ut waas ein groete dieretuin met vleege, motte en andere biësjes en insecten!
Lekker stinkend naor bed dan maar :).

Geschreven door Mayke.geniet