Hola!

Vandaag hebbe vanoet Medellín ein daagtripje gemak naor Piedra del Peñol en Guatapé.
We hebbe vanmorge op tied ein Didi genaome richting ut busstation. De groete busstations in de steden zien trouwes ech mega. Net kleine vliegvelden, maar dan ondudelijker waor alles is. Maar nao zeker 3x vraoge zoote we oetintelijk in de gooije bus.

Onderwaeg begos ut flink te raegene. Iets waor we vandaag gen raekening mei hadde gehalde. Weej zoote lekker in ozze korte boks met t-shirt/topje en hadde ozze raegenjasjes in ut hostel laote ligge... toch maar gewoen oetgestap beej de halte veur de Piedra del Peñol, en daor 2 plastic poncho’s gekoch. De begrieps ut natuurlik al: 5 minute later waas ut druug, dus Jeroen haet ziene neet ens aan gehad. Maar ach, ut waas gelökkig weer druug!

We meuste iers al flink waat trappe op um beej de ingang van de Piedra del Peñol te komme. Dit is ein gigantische rots, te midde in ein prachtig landschap met water, rotse en (schier)eilandjes. Ut meer is ontstaon door de aanleg van ein dam in de jaore 70.
De kins baovenop de rots komme daor zo’n 725 traptredes op te laupe. En det hebbe we gedaon! Zelfs Jeroen met zien hoëgtevrees haet ut gehaold, super knap! Baove waas ut oetzich super moei, dus daor hebbe we efkes de tied genaome veurdet we al die trappe weer umliëg meuste.

Onderaan hebbe we ein tuktuk gepak naor ut dörpke Guatapé. Ein leuk (maar ouk super toeristisch) gekleurd dörp. De huus hebbe bijna allemaol naeve gekleurde maore ouk un soort gekleurde reliëf-teikeninge. Deze were Zocalos geneump, en laote meistal zeen waat dr in ut specifieke gebouw gevestigd is.
Aan Instagram-waardige plekjes gen gebrek in Guatapé, en det waas te merke, en weej koste lekker lache um al die erme jonges die 600 foto’s motte make veurdet vriendinlief eindelijk tevreeje is euver eur pose :).

We hebbe lekker gelunch en waat rondgeslenterd in Guatapé, genaote van ein kopje koffie en gekeke naor de gekleurde en versierde tuktuks, veurdet we weer met de bus truuk meustr naor Medellín. Daor hebbe we lekker gegaete beej ein vega-pizza-restaurantje naeve os hostel.

Al met al weer ein super leuke daag!

Geschreven door Mayke.geniet