Hola!

Vandaag hadde we ein reisdaag. We ware al um half 8 vanmorge beej ut busstation um de bus van 8 aor naor Pereira te kinne pakke. Ein kleine bus waor we gezellig met 2 Nederlandse jonges hebbe geklets. De reis verleep veurspoedig en ein aor later ware we in Pereira waor we meuste euverstappe op de bus naor Riosucio. Um 2 minute euver 9 stonde we beej de balie waor ein dame os vertelde det we de bus van 9 aor nog wal koste pakke (det kin bliekbaar in Colombia). Zoe gezag, zoe gedaon. Ouk deze reis ging erg lekker, en 3 aor later stonde we op ut busstation in Riosucio, waor we de letste euverstap meuste make veur de bus naor Jardín. Ouk deze stond al klaor en zou 5 minute later vertrekke. Hielemaol top, wat ging dit allemaol lekker soepel! Daor hadde we neet op geraekend.

Maar helaas, deze rit ging minder soepel as de res van de daag. Onderwaeg ware dr vuul wegwerkzaamheden, en beej eine hebbe we wal anderhalf aor motte wachte veurdet we dr veurbeej koste. Oetintelijk, 5 en ein half aor later, kwame we rond half 6 aan in Jardín (nao ein totale rit van zo'n 9,5 aor). De lange reis waas ut wal hielemaol waerd, want waat is dit ein ontzettend leuk dörpke! Allemaol gekleurde, koloniale huuskes, gezellig straötjes en ein groet plein met allemaol gekleurde terrasjes. Maar veural de sfeer dae heej hink, zoe ontspanne en gezellig, ech waanzinnig!

Os hostel leet ein stök oet ut centrum, dus we besloete um vandaag op tied te aete. We hebbe op ein van de terrasjes ein lekker pizza gegaete (oprech, heej kin menig Nederlandse pizzeria nog van liere!), en hebbe daornao ein tuktuk gepak dae os naor os hostel haet gebrach. De waeg waas slech, dus ut waas weer flink hobbele!

We verblieve heej in ein ecolodge. Ut is ein leuk hoes gans van holt. Ut leet midde in de natuur, maar umdet ut al duuster is kinne we daor helaas nog niks van zeen. We gaon lekker op tied naor bed, want we hebbe de knolle flink gaar nao zo'n lange reisdaag!

Geschreven door Mayke.geniet