Hola!

Vandaag hebbe we de Valle de Cocora (de Cocoravallei) bezoch. Nao ut ontbijt zien we naor ut groete plein van ut dörp gelaupe en hebbe daor ein jeep gepak naor ut beginpunt van de hike. De jeeps zien erg kleurig en were heej ouk wal Willy’s geneump. Ze were zoe vol meugelijk geprop, en dan motte dr vervolges minse achterop staon. Ik moch gezellig as ein sardientje plaatsneme in de Willy, en Jeroen stond achterop. En dan scheure maar!

Beej aankomst op de parkeerplaats bleek det neet alles super good stond aangegaeve waor we heer meuste. De kins kieze veur ein korte route, of ein lange route dae se dan weer op 2 maniere kins laupe. Oetintelijk toch ein van de gooije ingange kinne vinde.
Ozze route startte in de vallei waor de waxpalmen staon, en waor de Valle de Cocora um bekind steit. Deze waxpalme kinne wal mier as 60 maeter hoeg were!
De klim umhoëg waas bes pittig, maar de prachtige oetzichte ware ut zeker waerd.

Onderwaeg kos se nog ein extra oetstapje make naor ut kolibrie-hoes, waor we ein kopje chocomel krege. Oeteraard ware heej ein haup kolibries te spotte! Waat zien die veugelkes snel!

De toch naor onder waas behuurlijk oetdagend. Doordet we in de vallei umhoëg zien gegaon, meuste we in de jungle naor onder. Ein leuke route met allemaol rotse, langs de rivier en euver hangbrugge. Ut waas wal oetkieke, want ut kos ouk good glad zien. Jeroen haet ein klein slippertje gemak, maar kwaam netjes op zien billen terech :).

Nao ein toch van diek 5 aor kwame we weer aan beej de parkeerplaats en waorte we door ein Willy weer truuk gebrach naor ut dörp. Heej hebbe we op ein terras lekker van ein verdeend biertje genaote. We merke trouwes wal det ut soms bes lastig is det weej eigelijk bijna gen Spaans spraeke. Op ut terras woorte verwelkomd door de ober, dae 2 minute aan ein stök in ut Spaans taege os aan ut vertelle waas. Weej hadde totaal gen idee wat hae bedoelde, maar naodet hae alles nog ens had ingespraoke in Google Translate, bleek det hae de ganse menukaart aan ut oetlegge waas, en beej welke gerechte se bijveurbeeld ries kriegs... en weej kwame allein maar veur ein pilsje....


‘S aoves hebbe we lekker gegaete beej ein Venezuelaans restaurant, en daornao hebbe we met ein ander stel Nederlanders ein potje Tejo gedaon, de Colombiaanse vorm van jeu de boules. Onder ut genot van ein biertje is ut de bedoeling detse ein schief/stein in ein cirkel goeis, en daorbeej kleine explosies luuts aafgaon. En die kinne hard knalle! En de Colombiane speule ut huul fanatiek. Ech ein gezellige aafsloeter van deze leuke daag.

Geschreven door Mayke.geniet