Hola!

Vandaag hadde we eine ganse daag in Bogota. We hebbe iers heerlijk ontbete beej Café Origenes, taege euver ut hostel. Colombiaanse koffie, eine met aeropress en eine met French press gezatte, arepa’s um te deile en allebei nog ein eige gerech. Genog um de daag te kinne beginne dus! (Disclaimer: de koffie waas naor ozze smaak erg slap. Ut leek eigelijk bijna mier op thee met koffiesmaak...)

Um 10 aor meuste we os melde op ein pleintje, want daor zou de free cycling tour dae we hadde geboek beginne. Ut begos wat later, maar det goof de groep schoelkinder die dr ware de tied um met os op de foto te gaon. Ut leek wal Sumatra, de ein nao de ander kwaam aan met dezelfde vraog: meuge weej astebleef met och op de foto?!

Nao ef zeuke hadde we ozze gids gevonde, en kos de fietstour beginne. We hebbe verschillende wieke van Bogota bezoch, en ozze gids José haet os vanalles verteld euver de geschiedenis van de stad. Leuk um zoe ouk andere deile van de stad te zeen as allein ut historisch centrum! Halverwaege zien we beej ein kraampje gestop waor we 4 verschillende fruitsappe koste preuve, en daornao van de lekkerste ein gans glaas koste bestelle. De roeije en oranje op de foto zien eigelijk utzelfde: Salpicon, ein soort fruitsalade waorvan ut fruitsap kin verschille. In dit geval mandarijn en aardbei. Ut witte drankje is gemak van guanabana en ut broenachtige drankje van borojo.

Nao de fietstour hebbe we lekker op ut pleintje waor de fietstour startte gelunch en biertjes gedronke. Vervolges zien we met de funicular de Monserrat opgegaon. We hadde met de kabelbaan umhoeg gewild, maar dae waas helaas geslaote. Gelökkig waas de funicular, ein kabeltrein, wal aope. Waat geit dae stiel umhoeg zeg!!
Baovenop de berg hesse ein prachtig oetzich euver Bogota, en zuuse pas wie groet de stad (waor zo’n 10 miljoen minse woene) ech is. Baovenop de berg raegende ut ein bietje, maar daordoor zooge we dr wal ein ganse raegenboog!

Op waeg truuk naor Candelaria kwame we beej ein pleintje waor waor vanalles te doon waas: kraampjes, muziek, minse die zoote te schake, de kos dr dien schoon laote poetse. Zoeiets kinse dich beej os hielemaol neet mier veurstelle!

‘S aoves hebbe we lekker gegaete beej Babou. Ein gezellig zaakje, waor de muziek veur Nederlandse begrippen vuul te hard stond. Dr woort echte Colombiaanse muziek gedreid, en op ein gegaeve moment waas dr ouk live muziek. Toen we weer onder kwame um te vertrekke zooge we det dr allemaol minse stonde te danse. Super leuk!

Al met al dus eine geslaagde daag. Zoemetein were we opgehaold door ein taxi um os naor ut busstation te bringe, waor we de nachbus zulle pakke naor Salento. Beniejd wie det zal zien!

Geschreven door Mayke.geniet