Hallo!

Vanmorge hebbe we ozze koffers gepak en ut appartement in Malaga verlaote. We hebbe de koffers in de auto gelag en zien naor Mercado Central de Atarazanas gegaon, de markthal van Malaga. Zaoterdaag ware we heej ouk ef langs gegaon, maar toen ware de meiste kraampjes al toe, en op zondaag is ut geslaote. Leuk um ef langs de kraampjes met vleis, olieve en greunte te laupe. Wal jaomer det alle viskraampjes toe ware, maar we hadde online al gelaeze det det op maondaag meistal zoe is, umdet dr dan nog gen vis is.

Daornao hebbe we op de boulevard ein elektrische step gepak, en zien we langs de kust naor El Palo gereeje.
Ut waas heerlijk um zoe langs de kust ein huul andere kant van de stad te zeen. El Palo zelf stelde neet vuul veur, dus we zien al vreej snel weer truuk ‘gestep’. Vervolges de auto in en op naor de volgende stad: Granada.

We beslote langs de kust te rieje via Nerja, en hebbe ein tussestop gemak in ut witte bergdorpje Frigiliana. Super leuk, klein dorpje met ein waanzinnig oetzich! Nao lekker wat te hebbe gedronke hebbe we ozze route vervolg en kwame we in de middaag aan in Granada.

Ouk heej hebbe we weer ein prima appartement. Wat kleiner as in Malaga, maar wal leuker aangekleid en met ein te reserveren daakterras met jacuzzi (waor we gen gebroek van hebbe gemak...).
Granada is weer totaal anders as Malaga. De hes ouk heej weer vuul kleine gezellige straotjes met terrasjes en taberna’s, maar ouk vuul mier groete ‘stadse’ straote. We hadde veur ‘s aoves ein leuk tapasrestaurantje oetgezoch, en beslote um al ein bietje op tied te gaon. Det huultnin, rond 8 aor, want ierder zien vuul restaurants heej neet ens aope, en de meiste spanjaarde komme pas vanaaf ein aor of 9. Maar helaas: ut restaurant waas geslaote. We hebbe beej ein ander leuk restaurantje in dezelfde straot gegaete. Wat huul leuk is heej in Granada, is detse beej de meiste restaurantjes en barretjes ein gratis tapas kriegs beej dien drankje!

Morge gaon we ut Alhambra bezeuke. We zien erg beniejd!

Geschreven door Mayke.geniet