Gooijendaag!

Vanmorge hebbe we nao ut ontbijt met ein gids ein trekking gemak door de riesvelde heej in Sidemen. Vuul van de riesvelde waor we doorheer lepe were momenteel as andere plantages gebroek veur onder andere chilipeper. Ut waas ein moeie, en soms ouk wal avontuurlijke trekking. Leuk!

Daornao hebbe we in ut hotel nog efkes gezwomme en veur ut lets genaote van de umgaeving heej. We woorte opgehaold door ozze chauffeur en zien iers naor de Besakih-tempel gereje. Deze tempel wuurd ouk wal de moedertempel geneumd, want ut is de groetste tempel op Bali. De tempel leet baove op ein heuvel, en met scooters woorte we naor baove gebrach. Gelukkig waas ut heej hielemaol neet druk, en same met ein lokale gids zien we euver ut tempelcomplex gelaupe. Ondanks det we al mierdere tempels hebbe gezeen, waas ut dit kier toch anders. Det kwaam umdet we noow ein gids beej os hadde dae os kos vertelle wat we noow eigelijk zooge en hoe ceremonies in zo’n tempel gaon.

Vervolges weer op waeg naor de volgende bestumming: Ubud. Heej zulle we 2 nachte verblieve. Ut hotel is matig. Pap en mam krege ein gratis upgrade van kamer, en det is fijn! De badkamer van Sjuulke en mich is namelijk huul klein en smaal, wuurs dr ein bietje claustrofobisch van. Dae van pap en mam is baeter, dus daor make weej maar gebroek van!
Nao smiddaags lekker gerelaxed te hebbe zien we ut centrum van Ubud ingelaupe. Waat ein drukte zeg! Ut is heej ontzettend toeristisch. We hadde ein tip gekrege veur ein warung um te gaon aete: Labalaba. Ein leuk tentje met heerlijke gerechte!

Haije en tot morge!

Geschreven door Mayke.geniet