Gooijendaag!!

Vanmorge koste we oetslaope. Um 9 aor hadde we pas met ozze chauffeur en eine lokale gids aafgespraoke. Röstig ontbete, en toen we truuk lepe naor de kamer zooge we inens ein vleerhond in de tuin! Waat zien die groet zeg!

As ierste zien we naor ein fabriek gegaon behurende beej ein plantage. Heej woort onder andere rubber, koffie, cacao en kroednagel gemak. Moei um die processe heej ens te zeen, en ouk wal indrukwekkend. Alles wuurd heej nog ech met de hand gedaon. Det zou beej os toch wal huul anders gaon volges mich!

Vervolges zien we de plantage zelf opgegaon. De gids vertelde os vanalles euver de producten die heej greuije. Erg leuk um ens te zeen waor ozze koffie, peper, sôkker en andere producten vanaaf komme en wie ut eigelijk groeit. Noeit geweite det peper ein soort klimop-plant is!

We verlete de plantage en reeje naor ein rietsôkkerraffinaderij. Toen we gister onderwaeg ware naor Kalibaru zooge we al ontzettend vuul vrachtwages rieje die heej mei ware volgelaaije. Op de parkierplaats stonde ouk ontzettend vuul vrachwages, nog steeds volgelaaije. De gids vertelde det ut wal ens veurkump det de machine kapot is. Dan motte de vrachwages maar gewoen wachte, soms zelfs 4 tot 5 daag!!

Heej in Indonesië meug ouk ech alles trouwes. Minse laupe heej gewoen euver ut spoor, haole in op plekke waor ut onverantwoord is, enz... Ozze gids lup heej ouk gewoen maar de plantages op en plukt zoemaar euveral de vruchten, braek rietsôkker aaf; allemaol gen probleem heej!

We reeje vaerder, naor ut dörp van Kalibaru zelf. Super leuk um te zeen wie de minse heej laeve. De kinder ware erg enthousiast um os te zeen, en natuurlijk meuste we ouk heej weer op de foto met de locals. De gids loodste os ein huuske in waor tempe en un tahu wuurd gemak. Ut zuut dr allemaol erg primitief en ein bietje viezig oet, maar dit is dus wal wie ut heej geit.

Daornao kwame we beej blikslagers oet. Ouk weer ech handwerk! Ze verkaupe heej vanalles: potten, pannen, vergieten, aoves... en alles wuurd gewoen zelf gemak van groete aluminium, blik of stalen platen. De gids leet os de werkplaats zeen waor ein aantal mannen aan ut werk waas. Knap wie ze det toch maar doon huur! Daornao hebbe we de lokale mert bezoch. Leuk um det met ein gids te doon, want dan lierse ouk ech waat heej allemaol verkoch en gemak wuurd!
As letste hebbe we nog ein palmsôkkerplantage en -fabriekje bezoch. Ouk heej weer op de foto!

Ut waas ein ontzettend leuke, interessante en liervolle daag!!!

Geschreven door Mayke.geniet