Hallo!

Vanmorge meuste we vruug op, ofja vanmorge... vannach eigelijk want ut waas kwart veur 3 toen we opstonde. Um 3 aor stond dr ein jeep met chauffeur veur os klaor dae os naor ein oetzichpunt haet gebrach. Iers vanoet ut hotel umlieg naor de “land of sand”. Heej riedse ein stök off-road, lekker scheure dus! Ozze chauffeur vertelde os det dr heej iddere daag ongevier 1000 jeeps in de buurt umhoeg rieje naor verschillende oetzichtpunte. Det waas ouk wal te merke. Veur en achter os zooge we huul vuul jeeps, en toen we de berg umhoeg ginge stonde dr euveral jeeps aan de kant geparkierd.
Rond 4 aor hadde we os plekje geclaimd, hielemaol veuraan zoedet we good oetzich hadde. We hadde os diek aangetrokke, want we ware gewaarschuwd det ut kald kos zien. En det waas ut ouk! Dr lepe allemaol verkaupers rond met jasse, sjaals en dekentjes.

Toen waas ut wachte. Wachte tot de zon op zou komme. Waat ein fantastische zonsopkomst zeg! In ut begin is ut gewoen gans duuster, en zuuse in de verte wat contouren van berg. Langzaamaan wuurt ut steeds ein bietje leechter en zuuse steeds mier van ut vulkanische landschap. En waat ein kleure in de lucht! Roed, geel, oranje, roze: prachtig! Ut is moeilijk um te beschrieve, maar de foto’s make al vuul dudelijk.
Toen de zon op waas meuste we nog efkes met ein paar Aziaten op de foto. Toen truuk de jeep zeuke. Gelukkig hadde we ein foto gemak van de kenteikenplaat!
In de file van jeeps reeje we weer naor onder toe. Normaal gespraoke zouse dan naor de bekinde Bromo-vulkaan rieje, um deze op te gaon. Helaas waas det noow neet meugelijk, want 19 juli is de Bromo oetgebarste, dus hebbe de autoriteiten de krater tijdelijk aafgeslaote veur ut publiek.

Truuk naor ut hotel, ontbete, ingepak en weer met Wahyu op waeg naor de volgende bestumming: Kalibaru.
Heej kwame we aan ut ind van de middaag aan in os leuke hotelletje. Dit waas vruger ein plantage, en de alde arbeiderswoeninge were noow gebroek as kamers.
We hebbe röstig efkes euver de accommodatie en beej behurende plantage rondgelaupe. We hebbe groete spinne gezeen!!!
Saoves hebbe we de race van Max gekeke, en daornao lekker naor bed. Ut waas ein lange, maar moeie daag!

Geschreven door Mayke.geniet