Hallo hallo!

Gisteraovend krege we van ozze gids ein filmpje doorgesteurd: de Gunung Tangkuban Perahu, dae weej ein paar daag geleje hebbe bezichtigd, is gister um 17.00 aor oetgebarste. Neet met lava, maar wal flinke rauk en as! Gelukkig zien we daor al gewaes.

Vandaag hebbe we Yogyakarta verlaote, en zien we met de trein naor Mojokerto gegaon. Heej kwaam ozze chauffeur os weer met ut busje en ozze bagage ophaole. Nog ein lange rit stond veur de boeg richting de Bromo-vulkaan.
En waat veur eine waeg! Ut deej os dinke aan Sumatra, want de waeg waas ontzettend slech. Bizar det de toegangswaeg naor ein van de groetste toeristische trekpleisters in Indonesië zoe slech is! Huul vuul gate in de waeg, dus ut waas weer flink hobbele. Ouk meuste we ein flink stök umhoeg, en de waeg waas aaf en toe ontzettend steil. Daorbeej zien de waege heej aaf en toe ouk nog ens ontzettend smaal. Beej os is det normaal de breidte van 1 riestrook, maar heej is ut gewoen ein waeg veur 2-richtingsverkier. Ik zoot veurin, en aaf en toe waas ut bes efkes de bille beejein kniepe huur!

Gelukkig zien we wal good aangekomme beej de accommodatie. Ut is ontzettend mistig, dus vuul kinne we nog neet zeen van ut vulkaanlandschap. Vannach weere we um 3 aor met ein jeep opgehaold um de zonsopkomst vanaaf ein oetzichspunt te gaon bekieke. Haopelijk is ut dan opgeklaord!

Haijeee!

Geschreven door Mayke.geniet