Hallo!

Vanmorge woorte we daor ozze chauffeur opgehaold um vaerder te reize naor ozze volgende bestumming: Bukit Lawang. Iers hebbe we nog ein korte tour door Medan gemak, en kwame we weer oet beej ut paleis en de moskee, waor we dit kier ouk naor binne zien gegaon.
Veur mich de ierste kier in ein moskee, toch leuk um ens mei te make. Mam, Sjuulke en ik krege ein sjaal um as kopdook gebroeke, en pap um zien bein te bedekke.
In de moskee kwame inens ein aantal maedjes naor os toe met de vraog of ze met os op de foto mochte; inens ware weej de bezienswaardigheid! We merke sowieso wal det de minse heej vuul naor os kieke, net alsof ze nog noeit blanke minse zeen haha.

Vervolges ginge we weer ut busje in, dit kier ech weg oet de stad. Toen we einmaal de stad oet ware waas metein te merke det ut verkier wat minder chaotisch waas, maar ouk det de waege steeds slechter woorte. Flink hobbele! Hoe Sjuulke in ut busje zoe haet kinne slaope is mich ein raadsel...

De route waas erg moei. We reeje langs groete palmolieplantages. Ut leek maar neet op te halde. Oeteindelijk kwame we aan in Bukit Lawang. We meuste ut busje oet en ozze bagage woort al veuroet richting de lodge gebrach. Um beej de lodge te komme meuste we ein hangbrug euver, wiebelen!
De lodge haet maar 1 ster, maar we zien aangenaam verrast! De accommodatie is super sfeervol, en ouk de kamers zeen dr ech huul netjes oet. We hebbe allein gen werm water, maar ut is heej zoe benauwd det det eigelijk hielemaol neet erg is. Ut leet pal aan de rivier en achter os begint de jungle, waor we morge ein trekking gaon doon. Toen we rondlepe euver de accommodatie hebbe we al vuul aapjes gezeen!

We hebbe lekker gegaete, en noow op tied naor bed, want morge motte we um 6 aor op.

Haijeee!

Geschreven door Mayke.geniet