Hallo hallo!

Vanmorge zien we vanoet Saigon naor de Cu Chi tunnels gegaon, 2 aor roeje van Saigon. Tijdens de Vietnam oorlog hebbe de Vietcong deze tunnels gemak. Super klein en super smal! Ech bizar!!
We koste zelf ouk door ein tunnel laupe/kroepe, deze ware speciaal gemak veur de toeristen en dus neet ens zoe klein as de echte tunnels. Ozze gids waas heej hielemaol in zien element en haet vuul verteld euver de geschiedenis van Vietnam en de oorlog.

Daornao zien we weer truuk gereeje naor Saigon, waor we ut War Remnants Museum hebbe bezoch. Ouk heej ging ut weer euver de Vietnam oorlog. Dr ware ouk ein paar zalen met fototentoonstellingen. Dr zoote erg moeie maar ouk hule heftige foto's tusse. Zoe realiseer se dich toch wal weer efkes wie erg det allemaol is!

We woorte um half 6 beej ut museum opgehaold veur ein streetfood tour. By bike, waas os verteld, dus we hadde os dr op veurbereid te gaon fietse. Det waas dus neet hielemaol de bedoeling, want we woorte opgehaold door scooters! Idderein kreeg weer ein eige gids waorbeej hae achterop meus. Ut ware allemaol minse van ozze eige laeftied, die ouk erg good ingels sproke. Ik zoot achterop beej Jennie, ein maedje die al eur ganse laeve in Saigon woent. Onderwaeg vertelde ze mich vanalles, en ze waas ouk huul geïnteresseerd in mich. We hebbe heerlik gegaete en ut waas super gaaf um zoe in ut donker door de stad te rieje. Ut verkier is ech enorme chaos, maar gelukkig is alles good gegaon zonder ongelukke!

Jennie vertelde mich det dr un logica achterzit hoe ze heej toeteren (wat ze erg vuul doon!).
1x = hoi, hallo, heej bin ik
2x = hald mich in de gate, let op mich!
3x of mier = GET OUT OF MY WAY
Toen ik dit wis snapte ik ut verkier wal inens ein stuk baeter!

We hebbe op 3 verschillende plaatse iets gegaete, en zien ouk gestop beej de flower market. Heej krege alle maedjes van de manne ein roos!

De tour steit veur mich noow wal in de top 5 van leukste dinge die we hebbe gedaon! Ein super aovend!!

Haije en tot morge!
Vuul leefs,
Mayke

Geschreven door Mayke.geniet