Hallo!

Nao alle avonture en ondanks de wermte toch wal redelijk geslaope vannach. Vanmorge meuste we weer um 7 aor op waeg en krege we ontbijt in de bus. We ginge op waeg naor Halong Bay.

Iers nog ein korte stop beej ein bedriefke waor ze parels kweken. Ze plaatse ein soort pareltje in ein oestertje en dan is ut de bedoeling det det ein moeie parel wuurd.

Vervolges weer truuk de bus in en op naor de haven. Daor stond ozze boet al te wachte. "Uhmm.. is det ozze boet?! Daor kinne we toch noeit met 16 man op slaope?!" Ware de ierste gedachtes. Maar we hadde geluk, want dit waas gewoen ut boetje waat os naor de echte boet meus bringe. De boet waas prima en we koste weer lekker met 2 man op 1 kamer met eigen badkamertje. Op de boet krege we vervolges lunch terwiel we begoste te vare. Wauw waat ein oetzichte zeg! Ut is heej ech prachtig. Wal ein bietje jaomer det ut bewolkt is, maar we meuge zeker neet klage!

Nao ein lekkere lunch meuste we os klaormake um te gaon kajakken. Halong Bay steit op de UNESCO erfgoed lies en wuurd dus beschermd, waordoor se neet zoemaar euveral meugs komme. Ut kajakken waas huul erg moei in deze umgaeving en erg gezellig. Vervolges ginge we met de boet naor ein strand op ein ander 'eilandje'. Heej kos ze met trappe umhoeg laupe naor ein oetzichtpunt. Helaas begos ut te raegene. Volledig doorweik kwame wr baove. Daor wachtte os ein fantastisch oetzich, maar ut waas helaas wal erg bewolk. Oeit wil ik dan ouk zeker nog wal truuk um dit opniej te zeen!
Toen we weer onder ware hebbe we nog lekker efkes in de zee gezwomme en op ut strandje gelaege.

Ut kleine boetje brach os weer truuk naor de groete boet waor we lekker hebbe gedineert. Nao ut aete waas ut tied veur ein privé feestje op de boet! Jaomer genog hadde we baove op ut dek gen verleechting, dus meuste we os feestje halde in de aetzaal waor ut ontzettend werm waas. Neet erg want ut waas erg gezellig!!

Haije en tot morge!
Vuul leefs,
Mayke

Geschreven door Mayke.geniet