Hallo!!

Vanmorge zien we rond 8 aor vertrokke. Dr stond ein vreej lange rit op ut programma richting ut binnenland en de berge.

Onderwaeg kwame we langs ein groete dam, dae bliekbaar huul belangriek is veur Vietnam, want ze wekken dr onder andere energie mei op. Vanwaege de vuule raegenval in Vietnam van de letste tied hadde ze de dam aope gezatte. Ut geweld van ut water wie det naor onder kump is waanzinnig!

In ut binneland zien momenteel vuul overstromingen, umdet ut raegenwater vanoet de berge allemaol naor onder struimp. Gelukkig hadde weej vandaag gen las van raege, maar ut waas wal ONTZETTEND heit. De zweits dich heej hielemaol kapot.

Vervolges zien we naor ein klein durpke gereeje waor ein minderheidsgroep woent: de Muong (gen idee of ik dit good schrief).
Toen we met os busje kwame aanrieje kwame de lokale vrouwe metein aangerend um os te verwelkomme. Ze woue allemaol det we met eur mei kwame naor eur hoes. Heej waas gen tied veur, want we krege heej ein heerlijke lunch!! Nao de lunch zien we beej 1 hoes efkes naor binne gelaupe. We ware blie det we weer os busje met airco in koste stappe!

Naodet we efkes in de file hebbe gestaon kwame we langs ein hotel waor we efkes ein duik mochte neme in ut zwumbad um aaf te keule. Daornao zien we doorgereje naor de homestay waor we vannach zulle slaope. De minse heej zien ouk weer ein minderheidsgroep: de White Thai.
Wauw! De ganse route waas al prachtig: de berg, de riesvelde en ech euveral waorse kieks is ut greun. Ozze homestay leet praktisch tusse de riesvelde, en de huuskes staon op paöl. Binne ligge allemaol matrasjes veur os op de grond, en de klamboes dr umheer make ut hielemaol aaf.

We hebbe weer ein lekker Vietnamees diner gehad, en daornao waas dr ein soort dansaovend. De vrouwe kwame met verschillende attributen ut 'podium' op en voerde dan ein dans oet. Ut publiek woort ouk oetgenudig um mei te doon. Lotte en ik meuste op ein gegaeve moment ein traditionele jurk aan um ouk met ein dans mei te doon. Ein super gezellige aovend!!!

Haije en tot morge!
Vuul leefs,
Mayke

Geschreven door Mayke.geniet