Hallo allemaol!

Vanmorge zien we wat later as gepland Rabat ingegaon. 'S morges raegende ut, dus hebbe we iers ein spelke gedaon in de riad veurdet we ech op paad ginge.
Met de tram zien we vanoet Salé naor Rabat gegaon, waor we as ierste ein Mausoleum en de Hassan toren zien gaon bekieke.
Daornao zien we doorgelaupe richting de Necropolis Chellah, waor vuul alde ruïnes van onder andere ein moskee en koranschoel stonde. Erg leuk!

Vervolges hebbe we ein wandeling gemak naeve ut paleis aaf richting de medina, waornao we door zien gelaupe naor de kasbah van Rabat. Erg leuk um heej rond te laupe. Weer erg kleine straotjes, en ut haet erges waat weg van Chefchaouen.

Ik mot ierlijk zegge det van alles waat we tot noow toe hebbe gezeen, ik Rabat neet ut meist indrukwekkend vond. De kos wal merke det dit ein iets modernere stad is: gen ezeltjes, mier auto's, vuul taxi's en de minse zien waat minder traditioneel gekleid. Rond ein aor of half 6 hadde we alles wal gezeen, en zien we truuk naor de riad gegaon um daor nog efkes te chille. Nou det truuk komme waas nog wal ein avontuur!! We hadde bedach um ein taxi truuk naor de riad te neme, det zou gen probleem motte zien dachte we. Ut probleem waas allein det ozze taxichauffeur gen woord engels of frans sprook, en totaal gen idee had waor weej precies heer meuste. Op ein gegaeve moment is dr ein ander mannetje ingestap, dae um met ozze telefoon met google maps naor de juiste bestumming haet gebrach!

Haije!

Geschreven door Mayke.geniet