Hallo hallo!

Vandaag waas ozze 2e daag in Johannesburg. Vanmorge hebbe we ein fietstour gedaon door Soweto. Soweto besteit oet verschillende townships. De guides ware ech ontzettend leuk, en goove os vuul informatie euver de geschiedenis van Soweto en de verschillende townships.
Doordet we op de fiets ware, waas de ervaring extra speciaal, want heej door kriegse metein vuul mier interactie met de lokale bevolking.
Ik vond ut ein erg bijzondere ervaring in de verschillende townships. Dr ware townships die dr nog bes oke oetzoge, maar dr ware ouk deile waor ech allein maar ‘blikke’ hutjes stonde. De umstandigheden in zo’n township zien ech verschrikkelijk, de kins dich neet veurstelle det minse, ald en jonk, daor iddere daag motte laeve. Maar hoe verschrikkelijk de umstandighede daor ouk zien, de minse make dr ut beste van, en det vind ik wal ech bewonderenswaardig! Euveral waor we fietste lepe minse euver straot, euveral zoogse lachende en speulende kinder, minse die ein preutje met elkaar aan ut make ware… ut zoog dr eigelijk huul erg gezellig oet. Ik dink neet det ik oeit ierder ein buurt heb gezeen waor de minse zoe sociaal ware.
Onder ut fietse waorte we ouk constant begroet door idderein. Minse heitte os welkom in Soweto, kinder zweide en wilde high-fives… Idderein waas huul aope en hartelijk.
Doordet vandaag ein feestdaag waas, hoofde de kinder neet naor schoel, dus we hebbe extra vuul high-fives gekrege!
Onderwaeg hebbe we nog ein lokale specialiteit gepreuf: koeienwangen. Klink neet zoe lekker, maar det waas ut wal. De fietstour waort aafgeslaote met ein lekker lunch. 

In de middaag zien Liko en ik naor ut Apartheidsmuseum gewaes. Ut waas ech ein huul interessant en indrukwekkend museum. Beej binnekomst waorte de minse iers gescheiden in White en Non-White, net as toen de Apartheid nog waas.
Ut museum waar bes wal groet, met vuul informatie euver de Apartheid en de minse die in dae tied ein belangrieke rol hebbe gespeuld.
Asse daor rondlups steise toch wal efkes dr beej stil hoe verschrikkelijk dae tied in Zuid-Afrika gewaes mot zien, en dan besefse ouk wal det ut nog hielemaol neet zoelang geleje gebeurd is allemaol…

Al met al ein erg leuke, interessante en indrukwekkende daag, waorin ik vuul heb gelierd euver de Zuid-Afrikaanse geschiedenis, en de huidige stand van zaken.

Haije en tot morge!
Kusjes en vuul leefs,
Mayke

Geschreven door Mayke.geniet