Vanmorge zien we um half 6 opgestaon, zoedet we um 6 aor koste vertrekke naor de Sossusvlei. Um 7 aor kwame we aan in Sesriem, waor we ontbijt hebbe gekoch beej ein tankstation en vervolges ut park zien ingereje.

Eindelijk weer ein verharde waeg! Nao ein ganse daag bijna allein maar euver de gravelroads te hebbe gereje waas ut heerlijk um weer euver ut asfalt te kinne rieje. Rond 8 aor kwame we aan beej Dune 45, ein van de bekindste zandduinen van ut park. Doordet weej wat aan de late kant ware (ut park geit um 6.30 aope, dus de meiste groepen ware al anderhalf aor in ut park) ginge de meiste minse en groepen alweer door, waordoor ut lekker rustig waas toen weej de duin umhoeg zien gelaupe.
Ut is onveurstelbaar wie werm ut al is in Namibië um 8 aor smorges!
Nao bovenaan de top wat foto's te hebbe gemak zien we weer truuk naor onder gelaupe, hebbe we ut zand oet ozze schoon geschud en zien we vaerder gereje.

Ut landschap is wederom fantastisch. Euveral oranje zandduinen.
Op ut ind van de waeg, aan ut einde van ut park, meuste we de auto parkiere en tickets kaupe veur de shuttle naor de daadwerkelijke sossusvlei en deadvlei. De waeg daorheer is veur ein normale auto need begaonbaar, en zelfs sommige 4x4 hebbe dr meuite mei (we hebbe dr eine zeen staon dae zichzelf had vastgereje en dae zich meus oetgrave).
De rit waas huul gaaf. Ut is eine prachtige route, maar wal huul hobbelig en schokkerig.

Beej de sossusvlei leet ouk 'big daddy' det is de hoegste zandduin van ut park. Liko is um gans umhoeg gegaon, ik heb ein poging gewaag, maar helaas leet mien kneen ut op det moment neet toe.
Vervolges zien we nog vaerder gelaupe naor de deadvlei. Det is ein stuk grond naeve 'big daddy' waor buim staon die al 900 jaor doed zien (det is wat we os hebbe laote vertelle). Door ut klimaat en de druugte rotte de buim neet weg. Ut is huul apart um die doeie buim zoe te zeen staon, midde in ein woestijn met verder niks dr um heer.

Rond 1 aor zien we truuk gegaon naor de auto, en rond 2 aor zien we ut park oetgereje. We hebbe heerlijk gelunch beej ein lodge (we hebbe os flink vol gedouwd haha) en zien vervolges weer ut park truuk ingereje, op naor de sesriem canyon dit kier. Totaal anders as wat we de res van de daag hebbe gezeen, maar ouk weer ontzettend moei!

We zien vervolges truuk gereje naor de accommodatie waor we tijdens ut diner (we krege antilope te aete, huul erg lekker!!) de zonsondergang hebbe bekeke.

Ik heb vandaag de meiste foto's met mien camera gemak, maar heb dr noow ein aantal toegevoeg die ik met mien telefoon heb gemak (neet zo'n gooie kwaliteit...). Um ein impressie te kriege van wat weej vandaag gezeen hebbe kint ge ut beste ens googlen op sossusvlei, deadvlei en sesriem canyon!

Det waas ut veur vandaag.
Haije en tot morge!

Kusjes en vuul leefs,
Mayke

Geschreven door Mayke.geniet